Казанда инклюзив белем бирү мәсьәләләренә багышланган Халыкара форум узды
Татарстан Республикасы Иҗтимагый палатасы, мәгариф һәм фән министрлыгы, Татарстан Республикасы Яшьләр эшләре министрлыгы ярдәме белән оештырылган «Инклюзив белем бирүнең дәвамлы системасы: хәзерге хәле һәм үсеш перспективалары» Халыкара форумы В.Г. Тимирясов исемендәге Казан инновацион университетында узды. Форумның партнерлары: Халыкара педагогик белем бирү Фәннәр академиясе, «Все для детей» АНО (Казан шәһәре) һәм «Белая трость» АНО (Екатеринбург шәһәре), «Лето» республика үзәге һәм югары мәктәп укытучылары Лигасы.
Әлеге форумны оештыручылар Россия Федерациясендә Гаилә елына, Татарстан Республикасында фәнни-технологик үсеш елына һәм В.Г. Тимирясов исемендәге Казан инновацион университетының 30 еллыгына багышладылар.
Форумда катнашучыларга мөрәҗәгать иткәндә университет ректоры, Татарстан Республикасы Иҗтимагый палатасы Рәисе урынбасары Юрия Тимирясова Россия Федерациясе Президенты Владимир Владимирович Путин инициативалары җәмгыятебездә инклюзив мәдәниятне үстерүгә яңа импульс биргәнен билгеләп үтте. «Күптән түгел Федераль җыенга юллаган хатында дәүләт башлыгы ана капиталы акчаларын үсеш үзенчәлекләре булган баланы реабилитацияләү чараларына һәм хезмәтләренә куллану мөмкинлеген кертергә тәкъдим итте. Һәм бу адым социаль реабилитация турында Федераль законның логик дәвамы булды. Ниһаять, Россиянең барлык төбәкләрендә инвалидларны реабилитацияләүнең бердәм стандартлары гамәлдә булачак, һәм алар нигезендә аларны озата бару системасы булдырылачак: медицина һәм социаль-психологик ярдәмнән алып, махсус ихтыяҗлары булган кешеләрне карьера планлаштыруга һәм укытуга кадәр. Яңа хокукый һәм социаль-икътисади чынбарлыкта инвалидлар мәгариф системасын алга таба үстерү юллары, сәламәтлек мөмкинлекләре чикләнгән балаларны тәрбияләүче гаиләләргә фәнни-методик ярдәм күрсәтү – бу һәм башка күп кенә мәсьәләләр форум программасында үзәккә әверелде», - диде ул.
Форумның беренче көнендә социомәдәни һәм белем бирү инклюзиясе буенча «БЕРГӘ БЕЗ - КӨЧ!» халыкара мәктәп укучылары һәм студентлар олимпиадасы узды, анда Казаннан 19 командага берләшкән төрле дәрәҗәдәге 117 белем бирү оешмасы, Майкоп, Махачкала, Яр Чаллы, Томск, Череповец, шулай ук Гродно һәм Витебск (Беларусь Республикасы) катнашты. Балаларга мавыктыргыч интеллектуаль сынаулар, интерактив уеннар һәм иҗади конкурслар тәкъдим ителде.
Форумның икенче һәм өченче көннәре тәҗрибә уртаклашуга һәм инклюзив психология һәм педагогика өлкәсендә фәнни тикшеренүләр нәтиҗәләрен тикшерүгә багышланган иде. XIII Халыкара фәнни-гамәли конференция программасы Россиядә инклюзив белем бирүнең хәзерге торышын тирәнтен анализлауга, сәламәтлек үзенчәлекләре булган кешеләрнең тормыш компетенцияләрен формалаштыруның нәтиҗәле практикаларына күзәтүгә багышланган пленар утырышларны үз эченә алган иде. Конференциядә катнашучылар Беларусь Республикасы һәм Татарстан Республикасының махсус педагогик технологияләрне кертү өлкәсендәге казанышларының якты презентацияләре белән кызыксындылар. Форумның йомгаклау көнендә 7 секция утырышында галимнәр һәм яшь белгечләр, педагогика һәм психология, медицина һәм социология, культурология һәм хокук өлкәсендәге абруйлы экспертлар, коммерцияле булмаган оешмалар һәм идарә органнары вәкилләре якын елларда инклюзив белем бирүнең дәвамлы системасын үстерүнең актуаль юнәлешләрен карадылар.
