Нигез буларак гаилә: ТР Иҗтимагый палатасында традицион кыйммәтләрне ныгыту турында фикер алыштылар

2026 елның 13 июле, дүшәмбе

13 июльдә Татарстан Республикасы Иҗтимагый палатасында «Татарстан Республикасында рухи-әхлакый кыйммәтләрне ныгыту һәм гаиләгә ярдәм итү» темасына түгәрәк өстәл узды. Чара Гаилә, мәхәббәт һәм тугрылык көнен бәйрәм итү кысаларында Россиянең традицион рухи-әхлакый кыйммәтләрен саклау һәм ныгыту буенча ТР Иҗтимагый палатасы комиссиясе тарафыннан оештырылды.

Түгәрәк өстәл эшендә Татарстан Республикасы Иҗтимагый палатасы рәисе урынбасары Тимур Кадыйров, профильле комиссия рәисе Ирина Александровская, Татарстан Республикасы мәдәният министры урынбасары Дамир Натфуллин, Татарстан Республикасы Министрлар кабинетының ЗАГС идарәсе башлыгы урынбасары Данис Сәләхетдинов, Татарстан халыклары Ассамблеясе башкарма комитеты җитәкчесе Ренат Вәлиуллин, Татарстан Республикасы Рәисенең эчке сәясәт, руханилар мәсьәләләре департаменты вәкилләре, шулай ук Иҗтимагый палата әгъзалары һәм чакырылган экспертлар катнашты.

Утырышны ачкан вакытта Тимур Кадыйров заманча җәмгыятьтә очрый торган төп проблемаларны – деструктив идеологияләрне көчләп тагу, традицион кыйммәтләрнең дәрәҗәсен төшерү һәм асоциаль тәртип үсүне билгеләп үтте.

Ирина Александровская Иҗтимагый палатаның традицион кыйммәтләрне саклау мәсьәләләрендә министрлыклар һәм ведомстволар белән тыгыз хезмәттәшлек итүенең мөһимлеген ассызыклады.

Дамир Натфуллин үз чыгышында шәхес үсешенең нигезендә рухи дөнья һәм мәдәният ятуын билгеләп үтте. Ул шулай ук тәрбиягә кечкенәдән үк керешергә, тарихи хәтерне сакларга һәм мәдәният өлкәсендә волонтерлык хәрәкәтен үстерергә кирәклеген ассызыклады.

Ренат Вәлиуллин ассызыклаганча, нәкъ менә традицион кыйммәтләрне саклау һәм читтән янаган куркынычлар алдында бердәмлек дәүләт тәңгәллеген һәм тотрыклылыгын саклап калуның нигезе булып тора.

Түгәрәк өстәл барышында Иҗтимагый палата әгъзалары, дини оешмалар һәм фәнни җәмәгатьчелек вәкилләре чыгыш ясады. Темалар арасында – яшьләр белән эшләүдә традицион кыйммәтләр, яшь гаиләләргә ярдәм чаралары, ТР халкының матримониаль практикасы, гаиләне ныгытуда дини оешмаларның роле һәм яшьләрне мәдәни мирасны саклауга җәлеп итү.

Фикер алышу йомгаклары буенча катнашучылар гаилә институтын ныгытуга һәм күп балалы ата-аналарга ярдәм итүгә юнәлдерелгән тәкъдимнәр формалаштырдылар. Тәкъдимнәр арасында – «Күп балалы гаилә паспорт-картасын» гамәлгә кертү, мәдәни-агарту проектларын арттыру, медиа һәм белем бирү программалары аша гаилә кыйммәтләрен популярлаштыру, шулай ук яшь парларга грант ярдәме күрсәтү практикасын дәвам итү бар.

Түгәрәк өстәлдә катнашучылар билгеләп үткәнчә, традицион кыйммәтләрне саклау – хакимиятнең, иҗтимагый оешмаларның һәм дин әһелләренең бердәм тырышлыгын таләп итә торган өзлексез процесс. Бу юнәлештәге эш уртак проектлар һәм инициативалар кысаларында дәвам итәчәк.