«Сенеж» идарә остаханәсе: «Коммерцияле булмаган оешмалар регионы» рейтингын Мәскәү һәм Татарстан җитәкләде

«Россия — мөмкинлекләр иле» Президент платформасының «Сенеж» идарәсе остаханәсендә РФ Иҗтимагый палатасының проект семинары старт алды.

Солнечногорскта «Россия — мөмкинлекләр иле» Президент платформасының «Сенеж» идарәсе остаханәсендә 22 сентябрьдә РФ Иҗтимагый палатасының проект семинары эшенең беренче көне старт алды. Анда гражданлык җәмгыяте вәкилләре — Россиянең барлык төбәкләренең Иҗтимагый палаталары әгъзалары катнаша. Татарстан Республикасын Иҗтимагый палата рәисе Зилә Вәлиева тәкъдим итә.

Семинарда катнашучыларны РФ Иҗтимагый палата секретаре Лидия Михеева сәламләде. Ул җәмәгать оешмалары хезмәткәрләрен федераль закон проектларына һәм башка норматив хокукый актларга иҗтимагый экспертиза үткәрү мәсьәләләрендә даими ярдәм итүләре өчен рәхмәт белдерде, мондый эшнең, шул исәптән закон чыгару хакимияте вәкилләре һәм ил җитәкчелеге өчен дә, зур әһәмияткә ия булуын ассызыклады. 

Лидия Михеева хезмәттәшләрен РФ Иҗтимагый палатасының 20 еллыгы белән котлады: «Барыбызның да горурланырлык һәм, әлбәттә, әле башкарасы эшләребез бар. Бу семинарда тормышка ашыру өчен кызыклы идеяләр тәкъдим ителер дип ышанам».

Бүген кешеләр популистик инициативаларга ышанмый, киресенчә, алар социаль әһәмиятле программаларны эшләү һәм гамәлгә ашыру өчен хакимият һәм иҗтимагый көчләр белән конструктив хезмәттәшлек итү яклы, дип билгеләп үтте үз чыгышында РФ Президентының иҗтимагый проектлар буенча идарә башлыгы Сергей Новиков.

«Хәзер, махсус хәрби операция барган вакытта, төп бурыч — җәмгыятьне РФ Президенты, милли лидер, Җиңү идеясе тирәсендә туплау. Җәмәгатьчелек фикерен сораштыру буенча без Иҗтимагый палаталарга да кешеләрне берләштерә торган максат билгеләүгә ихтыяҗ барлыгын күрәбез», — дип ассызыклады ул.

Спикер гражданнарның коммерцияле булмаган оешмаларга ышанычы буенча статистика белән уртаклашты. Әйтик, 2024 ел нәтиҗәләре буенча беренче урында волонтерлык оешмалары тора. Моннан тыш, Сергей Новиков гаилә тарафыннан булдырылган коммерцияле булмаган оешмалар эшчәнлегенә социаль ихтыяҗ булуга басым ясады. 

Сергей Новиков шулай ук топ-20 төбәкне тәкъдим итте, анда өченче сектор икътисади яктан әһәмиятле, тотрыклы эшли һәм хакимият белән хезмәттәшлекне җайга салган актив коммерцияле булмаган оешмалар бар. 

54 күрсәткеч һәм 170 метрика буенча сигез фактор нигезендә төзелгән «Коммерцияле булмаган оешмалар төбәге» рейтингында Мәскәү һәм Татарстан югары урынны тота. Түбән Новгород өлкәсе өченче урынны алды, Самара — дүртенче, ә Чиләбе өлкәсе лидерлар бишлеген япты.

Моннан тыш, спикер төбәк иҗтимагый палаталары өчен кайбер бурычларны да атады. Алар арасында коммерцияле булмаган секторның Россия Президентының илкүләм үсеш максатлары турындагы 309 нчы номерлы һәм Россиянең традицион рухи-әхлакый кыйммәтләрен саклау турындагы 809 нчы номерлы указларында билгеләнгән бурычларны үтәүгә юнәлеш тотуы. 

Тагын бер өстенлекле юнәлеш – яшьләрне тәрбияләү, хәтерне саклау, социаль адаптация, спортны һәм параспортны үстерү кебек иҗтимагый проектларда катнашу аша махсус хәрби операциядә катнашучыларның һәм ветераннар берлеге лидерларының социаль интеграциясенә ярдәм итү. 

Ышаныч темасын Бөтенроссия җәмәгатьчелек фикерен өйрәнү үзәге социаль тикшеренүләр һәм консалтинг департаменты аналитик үзәгенең әйдәп баручы аналитигы Александр Одинцов дәвам итте. Ул гражданнарның гаделлеккә ихтыяҗы бар дигән тикшеренүләр мәгълүматларын китерде. Уңай тенденция күзәтелә, әгәр 2007 елда сораштырылучыларның 10 проценты гына Россия җәмгыятен гадел дип санаса, 2025 елда респондентларның 47 проценты шулай дип саный.

Ил үсешенең стратегик фундаменты буларак «Россиянең ДНКсы» турындагы докладын РАНХиГС Президент академиясе проректоры Андрей Полосин тәкъдим итте.

Эксперт сүзләренчә, төп проблема шунда ки, иҗтимагый корылышның гамәлдәге концепцияләренең берсе дә хәзерге дөньяны һәм анда Россиянең урынын адекват тасвирларга сәләтле түгел. Соңгы вакытта аеруча ачык күренгән бу тотрыксызлык идеяләрнең яңа системасын эшләүне таләп итте. Аның фикеренчә, төп таләп рус цивилизациясенең нәрсә икәнен аңлату кирәклеге булды.

Андрей Полосин фикеренчә, бу таләп кысаларында хәл итүне сорый торган конкрет һәм кискен проблема мәгариф системасындагы кризис, аның нәтиҗәсендә кадрлар читкә китә. 

Карар сыйфатында эксперт идеология булдыру түгел, ә рациональ анализ юлын тәкъдим итте. Шул рәвешле, җәмгыятьне берләштерү һәм максатчан үсеш өчен гади һәм ачык ориентирлар кирәк, алар кешенең үзидентификациясе турындагы сорауга җавап бирәчәк һәм югары уку йортларында тәрбия бирү бурычларын хәл итәргә ярдәм итәчәк. 

РФ Иҗтимагый палатасының проект семинары эшчәнлеге 24 сентябрьгә кадәр дәвам итәчәк. Катнашучылар гражданнар җәмгыяте өчен аеруча актуаль булган мәсьәләләр буенча фикер алышыр өчен ике көн бар.