Яшел Үзәндә «ТР муниципаль берәмлекләрендә эшмәкәрләрнең иң яхшы Иҗтимагый советы» VI Республика конкурсының финалы узды

Россия Эшмәкәрлеге көне алдыннан бөтен республика эшмәкәрләре Яшел Үзән шәһәренең мәдәни үсеш Үзәге мәйданчыгында җыелды, анда «Татарстан Республикасы муниципаль берәмлекләрендә эшмәкәрләрнең иң яхшы иҗтимагый (координацион) советы» VI Республика конкурсына йомгак ясалды.

Үзәкнең фойесында масштаблы күргәзмә оештырылды, анда эшмәкәрләр үз товарларын һәм хезмәтләрен күрсәттеләр. Яшел Үзән мэры Михаил Афанасьев билгеләп үткәнчә, катнашучыларга тәҗрибә уртаклашу, яңа партнерлар табу һәм үз предприятиеләренең казанышларын күрсәтү өчен менә дигән мөмкинлек бу.

«Безнең эшмәкәрлек бергәлегенең никадәр талантлы булуына гаҗәпләнәсең. Үз юнәлешләрен таба, камилләшә, еллар, дистә еллар тәҗрибә туплый һәм җиңеп чыга», – диде ул.

Рәсми өлешне көткәндә Татарстан Республикасы кече һәм урта бизнес предприятиеләре ассоциациясе президенты Ильяс Нуриев хәбәр иткәнчә, быел конкурс катнашучылар саны буенча рекордлар куйды, бары тик «Татар-информ» сайтында узган онлайн-тавыш бирүдә генә дә 50 меңгә якын кеше катнашкан:

«Конкурсның төп бурычы –муниципаль органнарның эшлекле активлыгын ачыклау. Сыйфатны зур шәһәрләрдә яки башкалада гына алып булмый бит. Барлык районнар да үз өлешләрен кертәләр. Кемнеңдер яхшырак килеп чыга, кемнеңдер бик үк түгел. Безнең бурыч – барометр кебек, нинди юнәлешләрдә нинди активлык булуын күрсәтү».

Нуриев фикеренчә, Татарстанга кече һәм урта эшмәкәрлекне үстерү өлкәсендә уңыш елмайды. Билгеле бер җайга салынуга һәм әле эшлисе мәсьәләләр булуга карамастан, республика башка регионнар фонында лаеклы күренә, диде ул.

«24,2% – кече һәм урта эшмәкәрлек субъектларының тулай территориаль продуктына керткән өлеше. Ул башка регионнарга караганда югарырак», – дип ассызыклады ассоциация президенты.

Татарстанда кече һәм урта бизнеска ярдәм итү буенча конкурс инде алтынчы ел рәттән уздырыла һәм эшмәкәрләр җәмгыяте тормышында мөһим вакыйгага әверелде. Татарстан Республикасы Иҗтимагый палатасы Рәисе урынбасары Мөнир Гафиятуллин билгеләп үткәнчә, бу ярыш кына түгел, ә иҗтимагый советлар, координацион структуралар һәм җирле хакимиятләр эшенең нәтиҗәлелеген бәяләүнең мөһим коралы.

Аның сүзләренә караганда, соңгы елларда иҗтимагый советларның роле сизелерлек арткан. Бүген алар консультацияләр генә түгел, контроль функцияләрен дә үтиләр, бизнес проблемаларын хәл итүдә катнашалар һәм банк ресурсларына керү мөмкинлеге чикләнгән шартларда инвесторлар табарга ярдәм итәләр.

Аларның эшчәнлегенең өстенлекле юнәлешләренең берсе экологик көн тәртибе булды – аерым алганда, каты коммуналь калдыкларны җыю һәм эшкәртү мәсьәләләре. Конкурс республика районнарының бу эшкә актив кушылуын күрсәтте.

Гафиятуллин җитештерү өлкәсен техник яктан тәэмин итүнең кыйммәткә төшүе төп проблемаларның берсе булып кала, дип саный. Заманча җиһазлар сатып алу шактый инвестицияләр таләп итә, ә файдага чыгу өчен озак вакыт кирәк. Бу яңа юнәлешләр үсешен катлауландыра. Әмма ул билгеләп үткәнчә, республика эшмәкәрләре акрынлап ресурслар туплый һәм озак вакытлы капитал кертүләр файдасын сайлый, бу төбәк икътисадындагы уңай тенденцияләр турында сөйли.

Республика кече һәм урта эшмәкәрлек предприятиеләре ассоциациясе Советы Рәисе урынбасары Вәсим Вахитов «Татар-информ»га хәбәр иткәнчә, быел конкурста 40 районнан вәкилләр катнашкан, ә җиңүчеләр 12 номинациядә билгеләнгән.
«Без бүген иң яхшыларны бүләкләячәкбез. Бу безнең Ассоциациягә өстәмә кызыксыну бирәчәк һәм безгә дәүләт һәм иҗтимагый оешмалар белән бергә бизнесны үстерергә һәм республика икътисадын ныгытырга ярдәм итәчәк», – дип ассызыклады ул.

Вахитов шулай ук ассоциация эшмәкәрләргә комплекслы ярдәм күрсәтә дип сөйләде – кадрлар әзерләүдән һәм юридик ярдәм күрсәтүдән алып продукцияне сатуда ярдәм итүгә кадәр. Җитештерү проектларына, авыл хуҗалыгына һәм төзелеш бизнесына аерым игътибар бирелә. Шулай ук оешма эш башлаучы эшмәкәрләргә тәҗрибә уртаклашырга һәм уңышлы практикаларны үзләштерергә ярдәм итә.

Республика конкурсының рәсми өлешен Татарстан Республикасы Иҗтимагый палатасы рәисе Зилә Вәлиева Яшел Үзән мэры Михаил Афанасьев белән бергә ачты. Шәһәр башлыгы чараның мөһимлеген билгеләп үтте. Ул ассызыклаганча, кече бизнес статистикасының коры саннары артында чын кешеләр тора – инициативалы һәм хезмәт сөючән, эш урыннары булдыручы һәм үз гаиләләренең, шулай ук бөтен районның икътисадына өлеш кертүче кешеләр.

Афанасьев авыл җирлекләрендә эшмәкәрлекне үстерү перспективаларына аерым басым ясады. Аның сүзләренчә, нәкъ менә ерак җирләрдә шактый ресурслар тупланган: квалификацияле эшче көч, һәркем файдаланырлык мәйданнар һәм әзер инфраструктура. Авыл җирендә яңа бизнес-проектлар урнаштыру территорияне комплекслы үстерү һәм урыннарда эшкуарлык потенциалын ачу өчен көчле стимул булырга мөмкин, дип саный ул.

«Хәзер без авыл җирлекләренә эш урыннары булдыру, маятник миграциясен киметү һәм кешеләргә йорт янында эшләргә мөмкинлек бирү өчен киләбез. Моңа игътибар итүегезне сорыйм, чөнки анда хезмәт көче бар, оста куллы, хезмәт сөючән кешеләр бар. Шуңа күрә мин барлык яңа проектларымны агломерациядә, башкалада урнаштырырга гына түгел, ә авыл җирлекләренә дә чыгарга тәкъдим итәм. Чөнки анда мохтаҗлык та бар, һәм сезнең мөмкинлекләр дә конкурентлы булачак», – дип билгеләде Афанасьев.

Зилә Вәлиева үз чиратында искәрткәнчә, конкурс Россия эшмәкәрлеге көне алдыннан күркәм традициягә әверелде һәм гражданлык инициативасының республиканың тотрыклы үсешенә керткән өлешен чагылдыра. Аның сүзләренчә, бизнес бүген икътисад кына түгел, ә иҗтимагый катнашу формасы да, тотрыклылык чыганагы һәм соңгы еллардагы сынауларга тиз җайлашу үрнәге дә.

«Бүген без эшмәкәрләрне хөрмәтлибез, әмма бу шулай ук бүген алар өчен эшләнә торган эшләр, бәлки, тагын нинди федераль, республика чаралары, эшмәкәрлекне үстерү өчен яңа инструментлар кирәклеге смотры уза торган көн дә. Ә бүген бу ни дәрәҗәдә мөһим, мөгаен, 
Татарстан Республикасы Рәисе Рөстәм Миңнехановның Татарстан Республикасы Дәүләт Советына 2025 елга Юлламасындагы сүзләренә сылтама ясарга мөмкин. Ул эшмәкәрлекне үстерү – республиканың киләчәк үсешенең иң мөһим юнәлешләренең берсе, диде. Һәм 2024 елда кече һәм урта бизнес предприятиеләре әйләнеше беренче тапкыр 2,5 трлн сумнан артып китте дип ассызыклады», – диде Вәлиева.

Ул шулай ук ассызыклаганча, нәкъ менә пандемия яки катлаулы геосәяси вәзгыять кебек чорларда эшмәкәрләр үзләренең тотрыклылыгын, оперативлыгын һәм үз-үзен оештыруга әзерлеген исбатладылар. Республиканың күп районнарында бизнес махсус хәрби операциядә катнашучыларга ярдәм итү буенча волонтерлык инициативалары өчен терәк булды – биналар бирүдән алып финанслауга һәм матди ярдәмгә кадәр.

Татарстан Республикасы Иҗтимагый палатасы рәисе «Татар-информ» мәгълүмат агентлыгына конкурсны оештыруда актив катнашулары һәм гражданнарны югары дәрәҗәдә җәлеп итүләре өчен аерым рәхмәт белдерде.

«Татар-информ» бүген монда массакүләм мәгълүмат чарасы сыйфатында гына түгел. Алар да, асылда, оештыручылар сафына кергәннәр. Алар сораштыру уздырдылар – 50 мең тавыш бирүче булды. Без «Татар-информ» белән  эшләргә яратабыз, сезгә дә киңәш итәбез, чөнки бу конкурсларны уңышлы уздыру да, күпсанлы кешеләрне, республиканың гражданлык җәмәгатьчелеген җәлеп итү дә, тавыш бирү дә. Без бәйгене иң яхшы Яңа ел бизәлешенә карата уздырдык инде, бүген икенче шундый тәҗрибәбез булды. Рәхмәт сезгә, безнең яңа партнер-оештыручылар», – диде Вәлиева.

Халык тавыш бирүе нәтиҗәләре буенча җиңүче районга бүләкне  тапшырырга сәхнәгә «Татар-информ» мәгълүмат агентлыгы баш мөхәррире Ринат Билалов чыкты. Ул республика халкының югары дәрәҗәдә катнашуын билгеләп үтте һәм оештыручыларга ышанычлары өчен рәхмәт белдерде.

«Безне конкурсның мәгълүмати партнеры буларак сайлаганыгыз өчен рәхмәтле. Мондый хезмәттәшлек безнең өчен беренче тәҗрибә, һәм соңгысы булмас дип ышанам», – дип ассызыклады Билалов.

«Халык сайлавы» номинациясендә Яшел Үзән районы 19,5 меңгә якын тавыш җыеп лидер булды – гомуми саннан 39%.

Конкурсның абсолют җиңүчесе итеп Биектау районы координация советы танылды. Нәкъ менә аның эшчәнлеге иң нәтиҗәле, системалы һәм бизнес-мохиткә ярдәм итүгә юнәлдерелгән дип танылды. Бүләкләү тантанасы кысаларында эшкуарлар советлары эшенең төп юнәлешләрен үз эченә алган 12 махсус номинациядә дипломнар тапшырылды.

Номинацияләрдә республиканың түбәндәге муниципаль берәмлекләре эшкуарларының иҗтимагый советлары җиңүче булды:

• Хакимият һәм бизнес-берләшмәләр белән конструктив хезмәттәшлек өчен – Чирмешән һәм Түбән Кама районнары 
• Хәйрия һәм социаль объектларга ярдәм иткән өчен – Яр Чаллы
• Авыл җирлекләре территорияләрендә яңа производстволар (проектлар) булдыруга керткән өлеше өчен – Кайбыч районы
• Кече һәм урта эшмәкәрлек субъектлары тарафыннан инновацион продукция һәм технологияләр эшләүгә һәм алардан файдалануга керткән өлеше өчен – Лаеш районы
• Туризмны үстерүгә керткән өлеше өчен – Чистай районы
• Импортны алмаштыра торган продукцияне эшләүгә һәм җитештерүгә керткән өлеше өчен – Яшел Үзән районы
• Хуҗалык итүнең һәм кооперациянең кече формаларын үстергән өчен – Актаныш һәм Баулы районнары
• Эшкуарларга бизнес һәм социаль проектларны гамәлгә ашыру өчен грант ярдәме алуда булышкан өчен – Тукай районы
• Сәнәгать паркларын һәм эшмәкәрлекне үстерү инфраструктурасының башка объектларын төзүгә һәм тулыландыруга керткән өлешләре өчен – Аксубай һәм Теләче районнары
• Каты көнкүреш, авыл хуҗалыгы һәм сәнәгать калдыкларын җыю, сортларга аеру, транспортировкалау һәм эшкәртү системасын үстерүгә өлеш керткән өчен – Чүпрәле районы
• Иҗади (креатив) индустрияләрне үстерүдә катнашкан өчен (2024 елның 8 августындагы 330 номерлы ФЗ) – Әлмәт районы
• Халык сайлавы – Яшел Үзән районы

Татарстан Республикасының барлык муниципаль берәмлекләре эшмәкәрләренең иҗтимагый советлары махсус хәрби операциядә катнашучыларга ярдәм итүгә керткән өлешләре өчен бүләкләнде.