Россиянең яңа төбәкләреннән килгән психологлар КИУда белем ала
«Во благо жизни» хәйрия фонды һәм В.Г. Тимирясов исемендәге Казан инновацион университетының уртак гуманитар проекты кысаларында югары уку йорты базасында Донецк һәм Луганск халык республикаларыннан, Запорожье һәм Херсон өлкәсеннән 43 психолог һәм медикны һөнәри яктан яңадан әзерләү оештырылды.
Проект инициаторлары билгеләп үткәнчә, бу территорияләрдә клиник психологлар җитми. Күпьеллык рус телле халыкны геноцидлау, сугыш хәрәкәтләре, терроризм, даими курку, тормыш, якыннарын, туган йортларын югалту куркынычы кешеләрдә зур психологик проблемалар тудырды. Аларны үзең генә җиңеп булмый, ә белгечләр бик аз.
Белем бирү программасы проект өчен махсус рәвештә кискен эмоциональ һәм посттравматик стресслы кешеләргә психологик ярдәм күрсәтүнең актуаль мәсьәләләрен исәпкә алып эшләнгән. Курсларны тыңлаучыларга югары уку йорты үзенең электрон белем бирү платформасына керү мөмкинлеген бирде. Университетның заманча мультимедия лабораториясендә видеолекцияләр яздырылган, алар укытучыларның укучылар белән онлайн аралашуын тулыландыра һәм төрле тормыш ситуацияләрендә кеше тәртибе закончалыкларын танып белүне шактый киңәйтергә мөмкинлек бирә.
Укуны оештыручылар тыңлаучыларның югары мотивациясен билгеләп үтәләр. Алар белем алудан тыш, практика һәм авыр шартларда эшләп, үз укытучылары белән тыныч тормышка хас булмаган конкрет ситуацияләр белән уртаклашалар. Еш кына алар Казан галимнәреннән һәм экспертларыннан үз пациентлары өчен консультатив ярдәм алалар. Шулай итеп, белем бирү процессы һөнәри тәҗрибә уртаклашу белән үрелеп бара.
Татарстан Республикасы Иҗтимагый палатасы рәисе урынбасары Асия Тимирясова курсларны тыңлаучыларның нинди юнәлешләрдә эшләячәкләре турында төгәл күзаллаулары барлыгын билгеләп үтә. «Программаны тәмамлаучылар үз шәһәрләрендә һәм авылларында психологик үзәкләр ачарга һәм гражданнарның төрле төркемнәренә: балаларга, хәрбиләргә, аларның гаилә әгъзаларына, аларның ярдәменә мохтаҗ булган һәркемгә ярдәм күрсәтергә планлаштыра. Уку барышында алган белемнәр, һичшиксез, аларга үз планнарын тормышка ашырырга ярдәм итәчәк», - дип ассызыклады ул.