ТР Иҗтимагый палатасы рәисе Зилә Вәлиева сөйләмдә, ишетүдә тайпылышлары һәм менталь үзенчәлекләре булган балалар өчен йөзү турнирында булды
2022 елның 2 декабрендә ТР Иҗтимагый палатасы рәисе Зилә Вәлиева «Триумф» спорт комплексы базасында «Трамплин» хәйрия фонды тарафыннан уздыылган сөйләмдә, ишетүдә тайпылышлары һәм менталь үзенчәлекләре булган балалар өчен йөзү турнирында булды.
Турнирда ТР Дәүләт Советы депутаты, 12нче Шәһәр клиник хастаханәсе генераль директоры Рамил Әхмәтов, Казан шәһәре Башкарма комитетының Физик культура һәм спорт комитеты рәисе урынбасары Ришат Ибәтуллин, Казан шәһәре Думасы депутаты Мәдинә Сабирҗан, ТР Яшьләр министрлыгы әйдәп баручы киңәшчесе Любовь Степанова, Авиатөзелеш районы администрациясе вәкилләре катнашты.
Ярышта:
- Казанның 7нче интернат–мәктәбеннән сөйләмендә тайпылышлар булган балалар;
- Е. Г. Ласточкина исемендәге Казан интернат–мәктәбеннән ишетмәүче һәм начар ишетүче балалары;
- Казанның 4 нче интернат–мәктәбе һәм 61 мәктәбе тәрбияләнүчеләре;
- «Солнце внутри» коммерцияле булмаган автоном оешмасыннан Даун синдромы булган балалар;
- «Триумф» спорт комплексы бассейнында шөгыльләнүче терәк–хәрәкәт аппаратында тайпылышлары булган балалар катнаштылар.
Турнир балаларны сәламәт яшәү рәвешенә, йөзү белән шөгыльләнүгә җәлеп итү, коммуникация күнекмәләрен, команда эше һәм физик әзерлекне яхшырту максаты белән үткәрелде, бу аларны үстерүгә һәм җәмгыятьтә җайлашу мөмкинлекләрен арттыру өчен шартлар тудыруга өлеш кертә.
Балалар һәм аларның әти–әниләре үзләрен чын спортчылар итеп күрсәттеләр. Дистанцияне узудан, алтын медаль алудан, башкалар белән бер тигез булып ярышудан алынган хис–тойгылар гаҗәеп якты иде.
