1 сентябрьдән коммерцияле булмаган оешмалар һәм гражданнар өчен Татарстан Рәисе премиясенә гаризалар кабул ителә башлый
ТР Иҗтимагый палатасында гражданлык җәмгыяте институтларын үстерүгә керткән өлеше өчен Татарстан Республикасы Рәисе премиясен бирү комитеты утырышы булды. Премияне алуга документлар кабул итү 1 сентябрьдә башланачак һәм 2026 елның 5 октябренә кадәр дәвам итәчәк.
Кандидатларны тәкъдим итү Татарстан Республикасы территориясендә теркәлгән коммерцияле булмаган оешмалар, республика башкарма хакимият органнары каршындагы иҗтимагый советлар, шулай ук муниципаль берәмлекләрнең иҗтимагый советлары тарафыннан башкарыла.
Премия:
– Россия Федерациясе гражданнарына, социаль юнәлешле коммерцияле булмаган оешмаларга иҗтимагый танылу алган, социаль юнәлешле коммерцияле булмаган секторны үстерүгә зур өлеш керткән эшчәнлекләре һәм проектлары өчен, граждан җәмгыяте өлкәсендә югары һөнәри осталык дәрәҗәсе белән аерылып торган, яңалыкка һәм оригинальлеккә ия булган фәнни тикшеренүләре өчен;
– Россия Федерациясе гражданнарына Татарстан Республикасында граждан җәмгыяте институтларын үстерүгә күпьеллык шәхси өлеш кертүләре өчен бирелә.
Конкурста катнашу өчен тәкъдим итү турында үтенеч язуы, кандидатның анкета белешмәләре, тәкъдим ителгәнгә кадәр бер елдагы эшчәнлек турында мәгълүмат, граждан җәмгыяте институтларын үстерүгә керткән өлеше турында мәгълүмат, шулай ук гамәлгә ашырылган проектларның тасвирламасы һәм социаль нәтиҗәне раслый торган өстәмә материаллар тапшырырга кирәк.
Документлар 1 сентябрьдән 5 октябрьгә кадәр түбәндәге адрес буенча кабул ителә: Казан ш., Батурин ур., 7 й., 134 каб. Элемтә өчен телефон: 8 (843) 567-80-94. Сылтама буенча өстәмә мәгълүмат бирелгән.
Татарстан Республикасы Рәисе премиясе гражданлык җәмгыяте институтларын үстерүгә керткән өлеше өчен 2015 елда Татарстан Республикасы Президенты Указы белән гамәлгә куелды. Татарстан Россиядә мондый премияне гамәлгә куйган беренче төбәкләрнең берсе булды. 11 ел эчендә 977 гариза бирелгән, 81 кеше һәм оешма лауреат булган.
2024 елдан премия күләме ике тапкырга арттырылды: гражданнарга 500 мең сум, коммерцияле булмаган оешмаларга 800 мең сум бирелә. Ел саен гражданнарга өч премия һәм оешмаларга биш премия тапшырыла.
.jpg)