«Җиңү Кубогы» Татарстан һәм Луганск Халык Республикасы яшь спортчыларын берләштерде
Казанда «Динамо» стадионында Бөек Ватан сугышында Җиңүнең 81 еллыгына багышланган «Җиңү Кубогы» хәрби-спорт форумы булды. Чара балалар-яшүсмерләр спортын үстерүгә, сәламәт яшәү рәвешен пропагандалауга, балаларны даими рәвештә физик культура белән шөгыльләнүгә җәлеп итүгә һәм үсеп килүче буынны патриотизм рухында тәрбияләүгә юнәлдерелгән.
Ярышларда Татарстаннан яшүсмерләр, шулай ук шефлыкка алынган Лисичанск һәм Рубежный шәһәрләреннән 30 яшь спортчы катнашты, алар форумда беренче тапкыр чыгыш ясадылар.
Татарстанны республиканың кадет һәм профильле уку йортларында тәрбияләнүчеләр, шул исәптән Советлар Союзы Герое Николай Волостнов исем. Васильево кадет интернат-мәктәбе, Россия Эчке эшләр министрлыгының Алабуга суворов хәрби училищесы, «Алгоритм» технологик лицее (Россия Федерациясе Герое Иван Додосов исемендәге отряд), шулай ук Казанның берничә мәктәбе укучылары тәкъдим итте.
Форум программасына хәрбиләштерелгән ярышлар: катнаш эстафета, күп төрле көч ярышлары, шулай ук Калашников автоматын җыю һәм сүтү кертелгән иде.
Бүләкләү тантанасында ТР Иҗтимагый палатасы рәисе Александр Терентьев, ТР «Динамо» ФСО рәисенең беренче урынбасары Салават Гайсин, шулай ук ТРнан РФ Иҗтимагый палатасы әгъзасы, ТР «Динамо» рәисе киңәшчесе Ольга Павлова катнашты.
Александр Терентьев форумны үткәрүнең символик булуын билгеләп үтте:
«Җиңү Кубогы шефлыкта булган территорияләрне берләштерде һәм катнашучыларның берләшүенә ярдәм итте. Шунысы игътибарга лаек, ярышлар Җиңү көне – халкыбызның рухи кыйммәтләрен чагылдырган көн алдыннан үткәрелде. Ышанам, бу егетләрнең җиңүләре күп әле, әмма иң мөһиме, алар инде хәзер үк үз илләренең патриотлары булып үсә».
Форум беренче тапкыр гына үткәрелми һәм яшьләрнең физик үсешенә генә түгел, ә регионнар арасындагы элемтәләрне ныгытуга, Ватаныбыз тарихына һәм традицияләренә хөрмәт тәрбияләүгә дә ярдәм итә.
