ТР Иҗтимагый палатасы әгъзасы Ольга Павлова Чечня парламентында «Батырлар» программасын гамәлгә ашыру тәҗрибәсе белән уртаклашты
РФ Иҗтимагый палатасының Татарстан әгъзасы Ольга Павлова Чечня Республикасы Парламентында үткәрелгән «Гражданнарны пенсия белән һәм социаль яктан тәэмин итү, шулай ук махсус хәрби операциядә катнашучыларга һәм аларның гаилә әгъзаларына социаль ярдәм күрсәтү өлкәләрендә закон чараларын гамәлгә ашыруның актуаль мәсьәләләре (төбәк аспекты)» дип аталган түгәрәк өстәлдә ветераннар һәм махсус хәрби операциядә катнашучылар өчен «Батырлар. Татарстан Геройлары» программасын тормышка ашыру турында сөйләде.
«Программа махсус хәрби операциядә катнашучыларының идарә итү потенциалын ачарга һәм лидерлык сыйфатларын дәүләт хезмәтендә эшләү өчен файдаланырга мөмкинлек бирә. Ул Татарстанда уңышлы гамәлгә ашырыла», – дип Чечен парламентарийлары белән республика тәҗрибәсе белән уртаклашты Ольга Павлова.
Моннан тыш, чыгышында Татарстанның махсус хәрби операциядә катнашучыларга юнәлдерелгән һөнәри осталык буенча «Абилимпикс» чемпионатын уздыру өчен федераль мәйданчык булуын билгеләп үтте. Ярышлар 15 компетенция буенча узачак.
Шулай ук махсус хәрби операциядә катнашучыларны һәм терәк-хәрәкәт аппараты төрлечә бозылган балаларны спорт белән шөгыльләнү аша реабилитацияләү системасының юл картасы төзелә. Махсус операциядә катнашучылар арасында Татарстан Рәисе Кубогы мисал булып тора.
«Спортның адаптив төрләрен пропагандаларга, мотивацион видеороликлар әзерләргә, паралимпия чемпионнары һәм махсус хәрби операция геройлары белән очрашулар уздырырга кирәк. Бу мотивация, һәм ул бик мөһим. Кешеләр сәламәтлек мөмкинлекләре чикләнгән спортчыларның спорттагы казанышларын, шулай ук һөнәри эшчәнлектә уңышлы үзләрен тормышка ашыруларын күрергә тиеш. Бу аларның үз-үзләрен бәяләвен арттыра, җәмгыятьнең файдалы әгъзасы итеп тоярга ярдәм итә һәм, һичшиксез, аларны тизрәк реабилитацияләүгә һәм яраклашуга ярдәм итә», – дип үз фикерен җиткерде Ольга Павлова.
«Хәйриячелек Татарстан халыкларының канында. Татарстанның беренче Президенты Минтимер Шәймиев рухиятне саклау һәм ЮНЕСКО структуралары аша тарихи һәйкәлләрне саклау өчен күп хезмәт куя. Татарстан рәисе Рөстәм Миңнеханов төрле өлкәләрдә күп кенә хәйрия проектларына ярдәм итә», – дип йомгаклады Ольга Павлова.
Чыгышының ахырында ул Әхмәт Кадыйров исемендәге Иҗтимагый фонд президенты Аймани Кадыйровага аның фонды тарафыннан махсус операция сугышчыларына һәм аларның гаилә әгъзаларына зур ярдәм күрсәткәне өчен рәхмәт белдерде.
