ТР Иҗтимагый палатасы әгъзасы Розалия Нургалиева Гырон Быдтонда катнашты
Татарстанда милли бәйрәмнәр үткәрү Удмуртиянең Гырон Быдтоны белән дәвам итте. Республиканың Кукмара районы Нырья авылында үткәрелгән халык күңел ачу чараларына бөтен Россиядән 3 меңнән артык кунак килде. Бәйрәмдә ТР Иҗтимагый палатасының Мәдәният һәм массакүләм мәгълүмат чаралары комиссиясе рәисе Розалия Нургалиева катнашты.
«Гырон быдтон» удмуртчадан тәрҗемә иткәндә «сөрүне тәмамлау» дигәнне аңлата. Ягъни бу Татарстанда чәчү тәмамлану уңаеннан үткәрелә торган Сабан туе кебек үк бәйрәм. Удмуртларның күп өлеше – республикадагы гомуми санның 30%ы диярлек – Кукмара районында яши, 1,5 меңнән артыгы – быел кунаклар кабул иткән Нырья авыл җирлегендә.
«Гырон Быдтон, Сабантуй, Каравон, Семык, Уяв һәм башка бик күп бәйрәмнәр республикада Татарстанның күпмилләтле халкы арасында дуслыкны һәм татулыкны саклауны кайгыртуларын күрсәтә. Башкача яшәргә ярамый», – дип билгеләп үтте ТР Дәүләт Советы Рәисе Фәрит Мөхәммәтшин.
Бәйрәмнең рәсми ачылышы алдыннан кунаклар сәүдә рәтләрен һәм ишегалларын карадылар. Биредә аларны милли ризыклар белән сыйладылар, шулай ук удмурт халкының көнкүреш һәм мәдәният элементларын: чабаталарын ничек һәм нәрсәдән үргәннәрен, басуда нинди кораллар белән эшләгәннәрен һәм авыр хезмәт көненнән соң кешеләрнең ничек ял иткәннәрен сөйләделәр, күрсәттеләр. Мәйданчык уртасында кечкенә генә тере почмак урнашкан. Биредә бәрәннәрне, кәҗә бәтиләрен, казларны, хәтта тависны да күрергә мөмкин иде.
Бәйрәмнең рәсми ачылышы Россиянең төрле төбәкләреннән килгән иҗат коллективлары, шулай ук мәктәп укучылары һәм Нырья авылы халкы чыгышыннан башланды. Йола җырлары да башкарылды. Прологтан соң Мөхәммәтшин Кукмара районының алдынгыларын бүләкләде.
«Вось жук» йоласы удмурт боткасын әзерләү бәйрәмнең төп вакыйгаларының берсе булды. Аны пешерү өчен 40 килограммга якын бодай ярмасы, 15 кило атланмай һәм башлы суган, шулай ук 20 килограмм каз ите кулланганнар.
Нәтиҗәдә Россия рекорды куелды. Россия рекордлар китабына нигез салучы һәм баш мөхәррире Станислав Коненко билгеләп үткәнчә, илдә удмурт боткасының иң зур күләменә рекордлар әле куелмаган.
Үлчәүләрдә күренгәнчә, әзерләнгән савыты белән бергә ризыкның гомуми массасы төгәл 290 килограмм, ә ботканың үз авырлыгы 248 килограммны тәшкил иткән. Халык ризыгын теләге булган һәркем татып карый алды.
