«Хәтер юллары буенча» республика проектлар конкурсында җиңүчеләрне бүләкләү тантанасы булды

23 июньдә Дәүләт Советында «Хезмәткә һәм оборонага әзер» Бөтенроссия физкультура-спорт комплексы проектларының Бөек Ватан сугышында Җиңүнең 80 еллыгына багышланган «Хәтер юллары буйлап» республика конкурсында җиңүчеләрне тантаналы төстә бүләкләү церемониясе үтте. Конкурс лауреатларын социаль сәясәт комитеты рәисе Светлана Захарова, «Россия көче» Бөтенроссия спорт марафонының төбәк координаторы, ТР һәм РФ Иҗтимагый палатасы әгъзасы Ольга Павлова һәм Татарстанда «Хезмәткә һәм оборонага әзер» төбәк иҗтимагый оешмасы рәисе Эдуард Иванов сәламләде.

Җиңүчеләрне сәламләп, Ольга Павлова «Хезмәткә һәм оборонага әзер» комплексы үсештә һәм якын киләчәктә яңа юнәлеш – пилотсыз аппаратлар белән идарә итү юнәлеше барлыкка киләчәген билгеләп үтте. Ул шулай ук педагогларга, укучыларга һәм ата-аналарга конкурста актив катнашулары һәм ярдәмнәре өчен рәхмәт белдерде. «Әлеге конкурста катнашуыгыз сезгә яңа казанышларга көч бирә. Уңышлар телим һәм үзегезне теләсә нинди сынауларда сынап карарга курыкмагыз!», – дип лауреатларга мөрәҗәгать итте Ольга Павлова.

Конкурс традиция буенча «Россия көче» Бөтенроссия спорт марафоны кысаларында уза. Анда республика гомуми белем мәктәпләренең 5-7 сыйныф укучылары катнашты. Балалар сугышчан дан урыннары турында сөйләгән эшләрен күрсәттеләр. Конкурсның республика этабына республиканың төрле шәһәр һәм районнарыннан иң яхшы 25 эш сайлап алынды.

Быел «Россия көче» спорт марафоны дүртенче тапкыр үткәрелә. Марафон, яңа регионнарны да кертеп, Россия Федерациясе территориясендә төрле яшьтәге йөзләрчә мең кешене берләштерде. Ул 20 февральдә, Ватанны саклаучылар көне алдыннан старт алды һәм 3 сентябрьдә – Икенче бөтендөнья сугышы тәмамланган көнне төгәлләнәчәк.