Лисичанскида «Спортта минем тарихым» конкурсында җиңүчеләрне бүләкләделәр
Лисичанскида «Спортта минем тарихым» конкурсында җиңүчеләргә грамоталар һәм кыйммәтле бүләкләр тапшыру тантанасы булды.
Тантанада РФ һәм ТР Иҗтимагый палаталары әгъзасы, Россиянең атказанган тренеры Ольга Павлова һәм Татарстан шефлыгындагы ЛНР шәһәрләренең кураторы Татарстан вице-премьеры Фәнил Әһлиуллин катнашты.
Конкурсны «Бердәм Россия» сәяси партиясенең Татарстан Республикасындагы «Балалар спорты» федераль проектының төбәк иҗтимагый советы, партиянең Татарстан төбәк бүлеге, «Татарстан Республикасы Динамосы» ОГО ФСО, ТР Спорт министрлыгы оештырды.
Конкурста яшь катнашучыларның тарихлары буыннар дәвамының чын мәгънәсендә әһәмиятен күрсәтә, һәм бу бигрәк тә кыйммәтле, дип билгеләп үтте Ольга Павлова. Ул спортның тәнне чыныктырып кына калмыйча, характер формалаштыруын, рухи көч тәрбияләвен, авырлыкларны җиңәргә һәм бер-береңә ярдәм итәргә өйрәтүен ассызыклады. Аның фикеренчә, бу, нинди генә сынауларга карамастан, үз максатларына барырга ярдәм итә торган көчле мотиватор.
«Без спортны сайлыйбыз» номинациясендә беренче ике урынны Лисичанск 4 нче номерлы урта мәктәбенең җиденче сыйныф укучылары Валерия Горохова һәм Владислав Крупадер яулады. Лисичанскның 27 нче номерлы урта мәктәбенең унынчы сыйныф укучысы Арина Клименко өченче булды. Конкурста җиңүчеләргә кыйммәтле бүләкләр тапшырылды, алар арасында – музыкаль колонкалар, шулай ук яшь спортчы кызларның берсе өчен махсус приз – идән музыка системасы.
Спорт – физик активлык кына түгел, ул дисциплинага, үзүсешкә һәм җиңүләргә юл, дип ассызыклады Фәнил Әһлиуллин.
«Безнең төп максат – балаларны спорт белән мавыктыру, аларга алга, яңа үрләргә таба баруның һәрвакыт мөмкин булуын күрсәтү! Без егетләрнең физкультура белән генә шөгыльләнмәвен, ә моны системалы рәвештә, аңлы рәвештә, көчлерәк булырга теләп башкаруын телибез. Без сәламәт яшәү рәвешен пропагандалыйбыз, үсеп килүче буында дөрес ориентирлар формалаштырабыз, аларны көрәшергә, бирешмәскә, үз-үзеңә ышанырга өйрәтәбез», – диде ТР вице-премьеры.
