ТР Иҗтимагый палатасы рәисе Зилә Вәлиева Россия иҗтимагый палаталары Советы Президиумы рәисе итеп сайланды
Төбәк иҗтимагый палаталары белән хезмәттәшлек советы президиумының яңа составы сайланды.
Президиумга Лидия Михеева, Вячеслав Бочаров, Рифат Сабитов, Владимир Рогов һәм сигез төбәк иҗтимагый палатасының башлыклары керде
11 февральдә РФ Иҗтимагый палатасының Төбәк иҗтимагый палаталары белән хезмәттәшлек советы президиумының яңа составының беренче утырышы булды.
Россия Иҗтимагый палатасыннан Президиумга РФ Иҗтимагый палатасы секретаре Лидия Михеева, РФ Иҗтимагый палатасы секретаре беренче урынбасары Вячеслав Бочаров, РФ Иҗтимагый палатасының мәгълүмати бергәлекне, ММЧ һәм массакүләм коммуникацияләрне үстерү буенча комиссиясе рәисе Рифат Сабитов һәм РФ Иҗтимагый палатасының суверенитет, патриотик проектлар һәм ветераннарга ярдәм мәсьәләләре буенча комиссиясе рәисе Владимир Рогов керде.
«Совет президиумы бер елга сайлана, аның составына 12 кеше керә. 30 гыйнвардан 4 февральгә кадәр әлеге федераль округ составына кергән РФ субъектларының иҗтимагый палаталары җитәкчеләренең тавыш бирү нәтиҗәләре буенча төбәк палаталарының сигез җитәкчесе сайланды», — дип белдерде Вячеслав Бочаров.
Шул рәвешле, Президиум составына түбәндәге кешеләр керде:
— Калуга өлкәсе Иҗтимагый палата рәисе Оксана Милованова (ЦФО);
— Ленинград өлкәсе Иҗтимагый палатасы рәисе Александр Габитов (СЗФО);
— Татарстан Республикасы Иҗтимагый Палатасы рәисе Зилә Вәлиева (ПФО);
— Волгоград өлкәсе Иҗтимагый Палатасы рәисе Татьяна Гензе (ЮФО);
— Ингушетиянең Иҗтимагый Палатасы рәисе Ляйла Амерханова (КФО);
— Курган өлкәсенең Иҗтимагый Палатасы рәисе Михаил Белоусов (УФО);
— Красноярск краеның Иҗтимагый Палатасы рәисе Светлана Зылевич (СФО);
— Бурятиянең Иҗтимагый Палатасы рәисе Татьяна Думнова (ДФО).
Утырышның көн тәртибе нигезендә, катнашучыларга Россия иҗтимагый палаталары советы президиумы рәисен һәм рәис урынбасарын сайларга кирәк иде. Татарстан Иҗтимагый Палатасы рәисе Зилә Вәлиева һәм Волгоград өлкәсе Иҗтимагый Палатасы рәисе Татьяна Гензе кандидатуралары бертавыштан хупланды.
«Кешеләрнең ышанычыннан югарырак бернәрсә дә юк, — диде Зилә Вәлиева. — Нәкъ менә шушы ышаныч безгә бердәм эшләргә һәм илебез тормышына үз өлешебезне кертергә ярдәм итәр дип ышанам».
Зилә Вәлиеваның сәяси һәм идарә итү тәҗрибәсе зур, диде Рифат Сабитов..
«Мин Зилә Рәхимьяновнаны күп еллар беләм — ул чыннан да бик актив, грамоталы кеше, заманча әйткәндә, яхшы бэкграунды бар. Үз вакытында ул республиканың матбугат эшләре министры булды, вице-премьер вазифасын биләде, Татарстан хөкүмәтендә социаль блок алып барды, озак еллар "Казан Кремле" музеен җитәкләде һәм инде күп еллар төбәк палатасын җитәкли.», — дип, Сабитов аның сайлануына чын күңелдән шат булуын белдерде .
Утырышта Россия Федерациясе Иҗтимагый палатасының 2024 елдагы эшенә йомгаклар ясалды. Сүз, аерым алганда, халыкара элемтәләрне җайга салу, сайлауларны Иҗтимагый күзәтү буенча ситуацияләр үзәге эшен оештыру, шулай ук Президиумның сайланган әгъзалары — Оксана Милованова һәм Ләйлә Амерханова катнашкан «Сообщество» форумнарын уздыру турында барды.
Моннан тыш, катнашучыларга Россия Иҗтимагый палатасының 20 еллыгына багышланган вакыйгалар турында сөйләделәр, аларны тематик чараларда катнашырга чакырдылар.
Вячеслав Бочаров президиумның узган составы рәисе, Калининград өлкәсе Иҗтимагый Палатасы рәисе Игорь Селивановка рәхмәт белдерде, ул дүрт ел дәвамында ТКбФОдан Президиум составына сайланган иде.
«Мин ике тапкыр Калининград өлкәсендә булдым һәм төбәк палатасы һәм Игорь Олегович үзе алып барган зур эшне күрдем. Россия Иҗтимагый палатасы исеменнән аңа хезмәте өчен рәхмәт белдерәсем килә. Ышанам ки, киләчәктә сез шулай ук актив эшләячәксез һәм Россия Федерациясе субъектларына ярдәм итәчәксез», — дип сүзен тәмамлады Вячеслав Бочаров.
