ТР Иҗтимагый палатасы әгъзасы Ольга Павлова инклюзив Россия туризмын формалаштыру буенча утырышта катнашты

Россия туризмының яңа фундаменты салына һәм илнең яңа туристик кануннары контурлары эзлекле рәвештә формалаша. Шулай итеп, Россия Федерациясе Иҗтимагый палатасында узган, сәламәтлек үзенчәлекләре булган кешеләр өчен туристлык хезмәтләреннән файдалану мөмкинлеген үстерүгә багышланган эксперт сессиясе нәтиҗәләрен Татарстаннан Россия Иҗтимагый палатасы әгъзасы Ольга Павлова шәрехләде.

Россия Дәүләт Думасы караган инклюзив туризм турындагы канун объектлар территориясендә мөстәкыйль рәвештә йөрү мөмкинлегенә һәм инвалид затларны һәм аз хәрәкәтләнүче гражданнарны озатып йөрүгә бәйле туристлык инфраструктурасы мәсьәләләрен хәл итәргә тиеш.

Озата йөрүче этләрнең туристлык объектларына керү мөмкинлеген тәэмин итү, тиешле җиһазлар һәм мәгълүмат йөртүчеләрне урнаштыру, сәламәтлеге мөмкинлекләре чикләнгән кешеләр һәм катлаулы тормыш хәлендә булган затлар өчен туристик объектлар янында махсус парковкалар бүлеп бирү тәкъдим ителә.

«Уңайлы инклюзив мохит булдыру — бүгенге көндә „Туризм һәм кунакчыллык“ илкүләм проекты бурычларының берсе. Әлеге стратегик сессия кысаларында әйтелгән барлык тәкъдимнәрне киләчәктә закон проектының икенче укылышына төзәтмәләр сыйфатында исәпкә алырга мөмкин булачак», — дип аңлатты Ольга Павлова.

Иҗтимагый палатада узган сессия территориаль үсеш, шәһәр мохите һәм инфраструктура буенча РФ Иҗтимагый палатасы комиссиясе рәисе Андрей Максимов инициативасы белән узды.

Хәзерге рәвештә илкүләм проектлар Россиядә 2019 елдан башлап РФ Президенты Владимир Путин инициативасы белән гамәлгә ашырыла. 2025 елда яңартылган илкүләм проектлар старт алачак.