Р.Н. Миңнехановның Халыкара хатын-кызлар оешмалары җитәкчеләре белән очрашуы
Бүген Татарстан Республикасы Рәисе Рөстәм Миңнеханов «Женский взгляд» («Хатын-кыз карашы») трегы спикерлары - Халыкара хатын-кызлар оешмалары вәкилләре белән очрашты.
Очрашу «Россия – Ислам дөньясы: KazanForum» XV халыкара икътисадый форумы кысаларында «Казан Экспо» мәйданчыгында узды.
Модератор булып Россия кооперация университеты ректоры, «Мәрхәмәт – шәфкатьлелек» Татарстан Республикасы Дәүләт Советының хатын – кызлар-депутатлар берләшмәсе җитәкчесе Алсу Нәбиева чыгыш ясады.
«Форум кысаларында бездә хатын-кызлар юнәлеше бар, – диде Рөстәм Миңнеханов. – Бәлки, кемдер безнең цивилизация тарихында хатын-кызның ролен түбән бәялидер. Ләкин без бу рольнең мөһимлеген аңлыйбыз. Хатын-кыз булмаса, без дә булмас идек! Әйе, моннан башларга кирәк. Хатын-кызның балаларны тәрбияләүдәге роле, гаиләдәге роле – мөһим роль.
Рөстәм Миңнеханов сүзләренчә, бүген хатын-кыз гаилә учагы гына түгел, ә иң мөһиме. «Бүген хатын-кызларның уңышлы бизнесны тәкъдим итү, дәүләт идарәсендә катнашу мөмкинлеге бар, һәм бу гадәти хәл», – диде ул һәм аның янында утыручы хатын-кызларны тәкъдим итте – Татарстан Республикасы Премьер-министры урынбасары, Татарстан Республикасы Дәүләт Советы вәкиле, Татарстан Республикасы Мәдәният министры, Татарстан Республикасы Инвестицион үсеш агентлыгы җитәкчесе, Казан югары уку йортларынң берсенең ректоры.
«Хатын-кызлар ир-атларга караганда да эшчәнрәк, – дип үз күзәтүләре белән уртаклашты Татарстан Рәисе. – Дәүләт идарәсе системасында хатын-кызга тапшыру яхшырак булган әйберләр бар». Мисал итеп ул ТР Хөкүмәте вице-премьеры Ләйлә Фазлыеваның эшчәнлеген китерде.
Форум кысаларында «Хатын-кыз карашы» трегы турында сөйләгәндә, Рөстәм Миңнеханов бу аралашу форматын уңай бәяләде. «Без аралашырга, элемтәләр урнаштырырга, бер- беребезгә ярдәм итәргә тиешбез», – диде ул, тректа катнашучыларга мөрәҗәгать итеп.
Сәламләү сүзләре белән шулай ук Россия Федерациясе Федераль Җыены Федерация Советы каршындагы Евразия хатын-кызлар форумы Советы рәисе, Федерация Советының федератив төзелеш, төбәк сәясәте, җирле үзидарә һәм Төньяк эшләре комитеты рәисенең беренче урынбасары Карелова Галина Николаевна, «Россия хатын-кызлары берлеге» гомумроссия иҗтимагый-дәүләт оешмасы рәисе Лахова Екатерина Филипповна, Африка хатын-кызлары ассоциациясе президенты, Афанлум (Камерун) шәһәре мэры Мейанга Эпсе Ноа Нга Мари Анжель, Брикс (Һиндстан) илләренең Халыкара форумы президенты Пурнима Ананд һ.б. чыгыш ясады.
