«Игелекле Татарстан» премиясенең гариза кампаниясе башланды

«Игелекле Татарстан» республика ирекле эшчәнлек премиясенең гариза кампаниясе башланды. Төрле юнәлешләр каралган: сәламәтлек саклау, экология, инклюзия, мәдәният, вакыйгалар юнәлеше, махсус хәрби операция үткәрү зонасында ярдәм һәм башкалар.

Премия алуга ирекле эшчәнлекне оештыручылар дәгъва итә ала: коммерцияле булмаган оешмалар, уку йортлары, бизнес вәкилләре. Шәхси сыйфатында волонтерлар өч юнәлеш буенча конкурста катнаша ала: «Волонтерлар», «Командалар», «Бизнес». «Татарстан Республикасының Ел волонтеры» аерым бүләкләнә.

Узган сезонда Казан федераль университеты студенты Аммар Хуссейн җиңде. Ул Якутиядә янгыннарны сүндерүдә һәм махсус операция үткәрү зонасындагы миссияләрдә катнаша.

Волонтерларның казанышларын премиянең эксперт советы бәяләячәк, анда республиканың профильле министрлыклары һәм ведомстволары вәкилләре, профильле ирекле берләшмәләр лидерлары һәм ТР ирекле эшчәнлек ресурс үзәге хезмәткәрләре керә.

Премиянең гариза бирү кампаниясе 20 октябрьгә кадәр дәвам итәчәк. Гаризаны түбәндәге сылтама буенча бирергә мөмкин — https://dobro.ru/contest/101/apply/. 

Бүләкләү тантанасы ел ахырында узачак, анда Татарстан Республикасы Рәисенең Рөстәм Миңнехановның катнашуы күздә тотыла.

Премияне ТР Яшьләр эшләре министрлыгы һәм «Татарстан Республикасы Ирекле эшчәнлек мәгълүмати-ресурс үзәге» коммерцияле булмаган автоном оешмасы оештыра.

«Өченче ел рәттән без Татарстан Республикасы ирекле эшчәнлек берләшмәсен бер мәйданчыкта җыябыз. «Игелекле Татарстан» премиясе һәр волонтерга яки оешмага үзе турында белдерергә һәм бөтен республикага үзенең игелекле эшләре турында сөйләргә мөмкинлек бирә. Бу безнең республика гражданнарының патриотик һәм фидакарь гамәлләрен ачыклау өчен нәтиҗәле корал. Татарстанның игелекле җыелма командасы, без сезнең гаризаларыгызны көтәбез!» - дип ышандырды үзәкнең башкарма директоры Айрат Мөбарәкшин.