ТР Иҗтимагый палатасы әгъзалары Татарстанда Җиңүнең 77 еллыгын бәйрәм итүгә әзерлек һәм аны уздыру буенча оештыру комитеты утырышында катнашты
Татарстан Республикасында Җиңүнең 77 еллыгын бәйрәм итүгә әзерлек һәм аны уздыру буенча оештыру комитеты утырышында Татарстан Республикасы Президенты Рөстәм Миңнеханов 2025 елда Бөек Ватан сугышында Җиңүнең 80 еллыгын бәйрәм итүгә әзерләнергә кушты.
Рөстәм Миңнеханов хәбәр иткәнчә, бүген үк төп чаралар планын әзерләргә кирәк. «Бүген чаралар планын әзерләргә кирәк, - диде ул. - Ветераннар саны елдан-ел кими, һәм безнең бурыч - Бөек Ватан сугышында Җиңүнең 80 еллыгын лаеклы каршылау».
Рөстәм Миңнеханов шулай ук геройлар истәлеген мәңгеләштерү мәсьәләләрен аерым контрольдә тотарга кушты. Ул Хәтер китабы редакциясенең Бөек Ватан сугышы тарихын популярлаштыруга һәм яшьләрне патриотик тәрбияләүгә лаеклы өлеш кертүен искәртте. «1941-1945 еллардагы Бөек Ватан сугышы елларында Татарстан», «Социалистик хезмәт Геройлары китабы», «Өч дәрәҗәле Дан ордены кавалерлары» кебек фундаменталь басмалар әзерләнде.
ТР Премьер-министры урынбасары Ләйлә Фазлыева Җиңү көнен бәйрәм итүгә әзерлек буенча оештыру комитетының эше турында доклад ясады. Ул, аерым алганда, хәбәр иткәнчә, Татарстанда бүген 1941-1945 еллардагы Бөек Ватан сугышында турыдан-туры катнашучы 359 кеше яши. Бу категориядә ветераннар, катнашучылар, сугыш инвалидлары, тыл хезмәтчәннәре һ.б. бар. Республикада 17938 кеше исәпләнә (2015 елда - 76839 кеше).
Оештыру комитеты утырышы барышында Ләйлә Фазлыева хәбәр иткәнчә, 2014-2021 елларда Бөек Ватан сугышы ветераннары яши торган 1655 фатирга, йортларга (торак биналарга) ремонт ясалган. Агымдагы 2022 елда эш дәвам иттерелә, Казанда яшәүче ветераннарның 6 торак бинасына капиталь ремонт ясалачак.
Республикада социаль хезмәт күрсәтүдә 2131 Бөек Ватан сугышы ветераны тора, социаль хезмәт күрсәтүнең стационар учреждениеләрендә 56 ветеран яши. Моннан тыш, 2 меңнән артык ветеран өйләрендә социаль хезмәт кабул итә.
Ләйлә Фазлыева шулай ук Татарстанда «1941-1945 еллар хезмәт батырлыгы предприятиесе» республика исеме гамәлгә куелуын искәртте. Исем Бөек Ватан сугышы елларында хәрби һәм гражданлык продукциясен өзлексез җитештерүне тәэмин иткән предприятиеләргә биреләчәк. (Татарстан Республикасы Президенты Указы ПУ-266 2022 елның 12 апрелендә имзаланган).
Оештыру комитеты утырышы кысаларында Татарстан Президенты Бөек Ватан сугышы һәм махсус хәрби операция катнашучылары истәлегенә бер минутлык тынлык игълан итте.
Чарада Татарстан Республикасы Иҗтимагый палатасы рәисе Зилә Вәлиева, Татарстан Республикасы Иҗтимагый палатасы әгъзалары катнашты.
