ТР Иҗтимагый палатасы Рәисе урынбасары Рафил Ногуманов Татарстан һәм Кырым мөнәсәбәтләре тарихы турында сөйләде
Татарстан Халыклар дуслыгы йортында Кырымның Россия белән кушылуы көненә багышланган бәйрәм чарасы узды. Чара "Дуслык һәм татулык дәресләре" мәдәни-белем бирү проекты кысаларында узды. Бәйрәм чарасында Казан шәһәре Идел буе районының сигез мәктәбенең җиденче сыйныф укучылары катнашты.
Кырымның Россия белән кушылу көне ел саен 18 мартта билгеләп үтелә: нәкъ менә шул көнне Кырым ярымутравы Россия составына әйләнеп кайтты. Севастополь шәһәре - Россиядә федераль дәрәҗәдәге өченче, ә Кырым Республикасы - РФ составында 22 нче республика.
ТР Иҗтимагый палатасы Рәисе урынбасары Рафил Ногуманов Татарстан һәм Кырымның үзара мөнәсәбәтләр тарихы турында сөйләде. Ул балаларга сөйләшә белү, компромисслар эзләү - хәзерге шартларда бик мөһим белем, дип искәртте. Ул Кырым язы вакыйгаларына кадәр Татарстан вәкилләренең ярымутрау территориясендә тынычлык һәм татулыкны саклап калу өчен, кан коюга юл куймыйча, бик зур тырышлык күрсәтүләре турында сөйләде.
Тантаналы өлештән соң укучылар реаль тарихка нигезләнгән кыска метражлы фильмнар белән таныштылар. Фикер алышу барышында милли мәдәниятләрне, милләтара тынычлыкны һәм барлык халыклар арасында диалогны саклауның мөһимлеге турындагы мәсьәләләр күтәрелде.
Дәрес ахырында Татарстан халыклары Дуслыгы Йорты, Казан мәдәният институтының Күпмилләтле якшәмбе мәктәбе, Казан дәүләт консерваториясе артистлары катнашында концерт программасы куелды.
Аерым алганда, Россия белән Кырым кушылуның студентлар өчен дә яңа мөмкинлекләр бирүен билгеләп үттеләр, соңгы берничә елда Кырым Республикасының 18 вәкиле консерваторияне тәмамлады, хәзерге вакытта биредә 10 кеше төрле белгечлек буенча белем ала.
