«Сайлаучы өчен үтә күренмәлелек, легитимлык һәм уңайлылык»: ТР Үзәк сайлау комиссиясендә сайлауларга әзерлек турында сөйләделәр

2026 елның 28 августы, җомга

ТР Үзәк сайлау комиссиясенең «Точка выбора» («Сайлау ноктасы») мәгълүмат үзәгендә массакүләм мәгълүмат чаралары вәкилләре өчен 18-20 сентябрьдә үткәреләчәк Дәүләт Думасы депутатларын сайлауга әзерләнүгә багышланган брифинг булды. Чарада ТР Үзәк сайлау комиссиясе рәисе Андрей Кондратьев, ТР Иҗтимагый палатасы рәисе Александр Терентьев һәм палатаның Хокук мәсьәләләре һәм иҗтимагый контроль комиссиясе рәисе Тимур Какохо катнашты.

Андрей Кондратьев хәбәр иткәнчә, сайлау участокларын әзерләү актив стадиядә. Саклау ягыннан көчәйтелгән, ике дәүләт телендә барлыгы 6 миллион бюллетень бастырылачак. 9 сентябрьдән 14 сентябрьгә кадәр бюллетеньнәрне территория комиссияләренә, аннары документлар тәүлек буе сак астында булачак участокларга илтәләр. Татарстан Республикасы Үзәк сайлау комиссиясе башлыгы шулай ук җәмәгать контроленең өч нигезен билгеләде: күзәтүчеләр, видеоконтроль һәм журналистлар. Барлык территориаль һәм меңләгән участок комиссияләрендә тәүлек буе видеоконтроль, калган участокларда видеофиксация алып барылачак.

2018 елдан Татарстанда иҗтимагый күзәтү институтының системалы эше җайга салынган, бу елларда шактый тәҗрибә тупланган. Александр Терентьев билгеләп үткәнчә, җәмәгатьчелек күзәтүе эше буенча шактый олы тәҗрибә тупланган һәм бүген сайлау процессының аерылгысыз өлеше булып тора. Тавыш бирү көннәрендә барлык участокларда әзерлекле күзәтүчеләр эшләячәк. Укыту программасына хокукый әзерлек һәм реаль ситуацияләрне тикшерү белән практик тренинглар керә.

Тимур Какохо хәбәр итүенчә, күзәтүчеләрне укыту 43 муниципаль районда, шулай ук Казанда һәм Яр Чаллыда оештырылган. Планлаштырылган 2 800 күзәтүченең 1 281е әзерлек узган инде. Тавыш бирү көннәрендә 30 юрист эшләячәк, ә ИТ-паркта иҗтимагый күзәтү үзәге ачылачак.

Дәүләт Думасына депутатлар сайлау 2026 елның 18-20 сентябрендә үткәреләчәк.