Казанда «Яшь гвардия» тарихына багышланган «Антыгызга тугрылык – үлемсезлек» күргәзмәсе ачылды
22 июньдә, Хәтер һәм кайгы көнендә, 1941-1945 еллардагы Бөек Ватан сугышы Музей-мемориалында «Яшь гвардия» музееның (Луганск Халык Республикасы) Краснодонск Халыклар Дуслыгы ордены фондларыннан «Антыгызга тугрылык – үлемсезлек» күчмә күргәзмәсен ачу тантанасы булды.
Күргәзмә Бөек Ватан сугышы елларында оккупацияләнгән Краснодон шәһәрендә эшләгән «Яшь гвардия» антифашистик яшерен яшьләр оешмасының тарихына һәм хәрби эшчәнлегенә багышланган. Экспозиция оешма тарихының төп этапларын чагылдырган 12 стендтан тора – төзелүеннән алып геройлар турында хәтерне мәңгеләштерүгә кадәр.
Музей фондларыннан яшь гвардиячеләрнең чын әйберләре һәм шәхси әйберләре аеруча кыйммәтле: Лидия Андросованың көндәлеге, Анатолий Поповның «Я люблю свою Родину» («Мин үз Ватанымны яратам») әсәре, Любовь Шевцованың пионер галстугы, яшь гвардиячеләрнең анты, кулъязма һәм басма листовкалар, Иван Земнуховның комсомол билеты, Иван Туркенич һәм Сергей Тюленинның шәхси әйберләре. Яшь гвардиячеләрнең фашист төрмәләреннән әти-әниләренә тапшырылган язмалары үзәк өзгеч экспонатлар булып торалар.
Татарстан Республикасыннан РФ Иҗтимагый палатасы әгъзасы, күргәзмәне оештыручы Ольга Павлова ассызыклаганча, күргәзмәнең чын кыйммәте тәкъдим ителгән экспонатлар санында түгел, ә тарихи хәтерне һәм буыннар бәйләнешен саклауда:
«Хәтер – ул календарьдагы дата яисә мемориал гына түгел. Бу – система: эзләүчеләр, архив документлары, яшьләрне тәрбияләү эше, ветераннар үзләре һәм аларның истәлекләре. Әгәр бу система эшли икән, гражданнар теләктәшлеге бар. Бүген без монда буыннар эстафетасын узган заман геройларыннан бүгенге заман геройларына тапшыру өчен җыелдык.».
ТР мәдәният министры урынбасары Ленар Хәкимҗанов билгеләп үткәнчә, «Яшь гвардия»нең беренче музее 1946 елда, илебез әле хәрабәләрдән торгызыла гына башлаганда ук ачылды. Аның сүзләренә караганда, бу истәлекне саклап калу һәм аны киләсе буыннарга тапшыру мөһим.
Ачылу тантанасында «Яшь гвардия» Краснодонск музее директоры Наталья Николаенко, Татарстан Республикасы Милли музее директоры Айрат Фәйзрахманов, ТР Яшьләр эшләре министрлыгы, ТР Дәүләт Советы, ТР Иҗтимагый палатасы вәкилләре, шулай ук депутатлар, җәмәгать эшлеклеләре һәм яшьләр оешмалары катнашты.
Чара кысаларында Татарстан Республикасы Милли музее һәм Краснодон Халыклар дуслыгы орденлы «Яшь гвардия» музее арасында хезмәттәшлек турында килешү имзаланды.
«Антыгызга тугрылык – үлемсезлек» күргәзмәсе – героик тарихка кагылу, батырлык турындагы истәлекне саклау һәм аны киләчәк буыннарга тапшыру мөмкинлеге ул. Күргәзмә 26 июньгә кадәр эшләячәк.