ТР Иҗтимагый палатасы рәисе Зилә Вәлиева делегация составында Воронеж мегамәктәбендә һәм «Изумрудный город» балалар бакчасында булды

14 октябрьдә Черноземье башкаласында «Берләшмә» федераль форумы старт алды. Россиянең Иҗтимагый палаталары әгъзалары делегацияләре Воронежның әйдәп баручы мәгариф учреждениеләрендә –«Изумрудный город» балалар бакчасында һәм «Содружество» («Бердәмлек») белем бирү үзәгендә булдылар. Татарстан Республикасыннан ТР Иҗтимагый палатасы рәисе Зилә Вәлиева чыгыш ясады.

Мәскәү проспектындагы «Содружество» үзәгендә делегатлар хозурына заманча белем бирү практикалары тәкъдим ителде. Кунаклар дроннар конструкцияләү, программалаштыру классларында, күп функцияле китапханә киңлегендә, концерт залында һәм ашханәдә булдылар. Мегамәктәптә кулланыла торган уку сыйныфларын билгеләүнең гадәти булмаган системасы кунакларда кызыксыну уятты. Искәртеп үтәбез, биредә укучылар тарафыннан тәкъдим ителгән һәм шифрланган «Т» (талантлы), «Я» (якты), «И» (интеллектуаль) хәрефләре кулланыла.

Агымдагы елның июлендә ачылган «Изумрудный город» балалар бакчасында делегация вәкилләре биналарның яңа типтагы үсеш мохитен тудыра торган авторлык дизайнын югары бәяләделәр. Яңа мәктәпкәчә учреждение «Содружество» мегамәктәбе белән бердәм комплекс төзи һәм якынча 25әр кешелек 24 төркемне сыйдырышлы.

Форумның беренче көнендә мегамәктәп мәйданчыгында мәктәпкәчә белем бирүнең сыйфаты турында фикер алышу булды.

Очрашуда мәктәпкәчә белем бирү өлкәсендә «Үсеш бакчасы» дигән яңа төбәк проекты турында да сүз барды, аның кысаларында балалар бакчалары базасында балалы гаиләләр өчен психологик-педагогик, медицина һәм социаль ярдәм үзәкләре челтәре төзеләчәк. Аны 2026 елда эшләтеп җибәрергә планлаштыралар.