Әгерҗе районының Иҗтимагый советы әгъзалары Кырынды авылында булдылар

Кырынды авылына Әгерҗе районы Иҗтимагый советы әгъзалары: Иҗтимагый совет рәисе Александр Лапшин, Иҗтимагый советның авыл территорияләрен үстерү, авыл хуҗалыгы, җирле үзидарә һәм экология буенча даими комиссиясе рәисе Ромель Маннапов, Иҗтимагый советның яшьләр сәясәте, спорт һәм туризм буенча даими комиссиясе рәисе Александр Еникеев килде.

Кырынды авыл җирлеге башлыгы Рәмис Мәүликаев һәм Кырынды авыл китапханәсенең әйдәп баручы китапханәчесе Фәридә Артемьева кунаклар өчен авыл буйлап экскурсия оештырдылар, аның тарихы һәм истәлекле урыннары турында сөйләделәр.

Кунаклар авыл китапханәсендә һәм музеенда булдылар, аларның эшчәнлеге һәм «Жить, чтобы помнили» («Хәтердә калырлык итеп яшәү») һәм «Мой край сквозь таинство страниц» («Төбәгем  серле сәхифәләрдә») кебек проектлары белән таныштылар.

Александр Лапшин китапханәгә «Именные локомотивы депо Агрыз Горьковской железной дороги» («Горький тимер юлының Әгерҗе депосының исемле локомотивлары» һәм «Бронепоезда локомотивного депо Агрыз Горьковской железнодорожной дороги» («Горький тимер юлының Әгерҗе локомотив депосының бронепоезды») дигән авторлык брошюраларын бүләк итте. Бу басмалар укучыларны кызыксындырырга һәм аларга төбәкнең тимер юл тарихы турында күбрәк белергә ярдәм итәчәк.

Мондый очрашулар тарихи хәтерне саклауга, мәдәниятне үстерүгә һәм буыннар арасындагы элемтәләрне ныгытуга ярдәм итә.