Казанда хәйрия фондлары съезды узды
Җыелыш хәйриячелекне үстерүгә, төбәк һәм халыкара дәрәҗәдә хәйрия проектларын гамәлгә ашыруда көчләрне берләштерүгә багышланган.
Форумда Татарстан, Дагыстан, Ингушетия, Башкортстан һәм Ульяновскидан 16 хәйрия фонды катнашты. Фонд вәкилләре тәҗрибә уртаклаштылар һәм үзләренең уңышлы проектлары һәм планнары турында сөйләделәр.
Съездны «Сабиль» хәйрия фонды (Казан шәһәре) оештырды, ул быел июль башында Татарстан фондлары белән бергә Домбай бистәсендә (Карачай-Черкес Республикасы) «На вершине» форумында катнашты. «Казандагы җыелыш «На вершине» Төбәкара форумының логик дәвамы булды, без анда Кавказда булдык. Домбайда каралган проектларның социаль эффектын бәяләү һәм грант ярдәме темалары Казандагы очрашуда үстерелде», - дип сөйли «Сабиль» фондының үсеш бүлеге җитәкчесе Фәнис Габидуллин.
Шулай ук җыелыш темаларының берсе дәүләт хакимияте органнары белән үзара хезмәттәшлекнең нәтиҗәлелеген арттыру булды. Россия Икътисади үсеш министрлыгы мәгълүматлары буенча, илнең барлык юридик затларының 0,5 процентын тәшкил иткән коммерцияле булмаган оешмалар тулаем эчке продуктның 1,5 процентын тудыра. Шуңа күрә дәүләт коммерцияле булмаган оешмалар белән уртак нәтиҗәле эш белән кызыксына.
Казан шәһәрендәге форумда чакырылган спикерлар арасында Түбән Новгородтан менеджмент буенча эксперт Игорь Артемов та бар иде: «Җыелышта без хәйрия һәм коммерцияле булмаган оешма өчен идарә итү моделен һәм шәхесне эзләү мәсьәләләрен карадык, шулай ук персоналны сайлап алу һәм бәяләүнең төп методикаларына чумдык, бу тема фондлар өчен дә бик актуаль. Күп кенә тере сораулар һәм фикер алышулар булды. Хәзер без хәйриячеләрнең профессиональ дәрәҗәсен ничек күтәрергә мөмкин дип уйлыйбыз, социаль эффект санлы гына түгел, сыйфатлы да булсын өчен!».
Актуаль темалар арасында форумда катнашучылар иждивенчество проблемасы турында фикер алыштылар. Матди яктан ярдәм итеп, мохтаҗ кешегә ничек зыян китермәскә? Фикерләүне үзгәртеп һәм белем биреп, кешеләрне авыр хәлдән ничек чыгарырга? Бу проблемаларга һәм хәйриячелек нигезләре мәсьәләләренә Дагестаннан килгән кунак имам Габдерахман Шәрәфетдиновның лекциясе багышланган иде.
Төркия һәм Сүриядәге фаҗига фондларның бергәләп катлаулы мәсьәләләрне оператив һәм югары нәтиҗәлелек белән хәл итә алуын күрсәтте. «Икенче көнне үк без инде җир тетрәү урынында идек, фикердәшләр командасын җыйдык, офис алып, оператив штабны җәелдердек, - дип үз тәҗрибәсе белән уртаклашты «Сабиль» хәйрия фонды халыкара проектлары җитәкчесе Тарлан Хәлилов. Урында булганда, без зыян күрүчеләрнең нинди ихтыяҗлары барлыгын ачык аңладык һәм иң күп басым Төркия территориясендә яшәүче зыян күргән сүриялеләргә ясалды, аларның хәле документлар булмау сәбәпле начарланган иде. Хәйрия фондларына Төркиядә алган уртак эш тәҗрибәсен системалаштырырга һәм аны башка проектларны гамәлгә ашыруда кулланырга кирәк.
Съезд программасы бай һәм нәтиҗәле килеп чыкты. Оештыручыларның берсе, «Сабиль» хәйрия фонды директоры Тимур Әхмәтгалиев билгеләп үткәнчә: «Әлеге чаралар хәйриячелекне системалы дәрәҗәдә үстерү өчен мөһим, бу съезд ел саен уздырылыр һәм күп файда китерер дип өметләнәбез».
