ТР Иҗтимагый палатасының Мәгариф һәм фән буенча комиссиясе рәисе Асия Тимирясова авыл мәктәпләрен үстерү проблемалары буенча түгәрәк өстәл эшендә катнашты

2021 елның 14 апреле, чәршәмбе

Россия Иҗтимагый палатасының агросәнәгать комплексын һәм авыл территорияләрен үстерү комиссиясе тарафыннан оештырылган җанлы дискуссия барышында авыл җирлегендә урнашкан мәктәпләрнең эшчәнлеген оптимальләштерүгә кагылышлы төрле фикерләр яңгырады. Түгәрәк өстәл эше белән комиссия рәисе Юлия Оглоблина җитәкчелек итте.

Авыл мәктәпләренең торышы, аларны үзгәртеп корганда барлыкка килгән проблемалар турында Мордовия Республикасы мәгариф министры вазыйфаларын башкаручы Елена Солдатова, шулай ук Мәскәү өлкәсенең Головкино, Талихино, Кошелево авыллары вәкилләре сөйләде.

Татарстан Республикасы Иҗтимагый палатасының Мәгариф һәм фән буенча комиссиясе рәисе, Татарстан Республикасы Мәгариф һәм фән министрлыгы каршындагы Иҗтимагый совет рәисе Асия Тимирясова түгәрәк өстәлдә катнашучыларның игътибарын авыл мәктәпләре инфраструктурасын модернизацияләү проблемаларына юнәлтте. Татарстанның уңай тәҗрибәсенә таянып, ул билгеләп үткәнчә, «Демография», «Мәгариф» һәм «Торак һәм шәһәр мохите» милли проектлары кысаларында гомуми белем бирү оешмаларының яңа корпусларын төзү һәм масштаблы реконструкцияләү бара, аларның матди базасы сизелерлек модернизацияләнә. Асия Витальевна авыл җирлегендә урнашкан мәктәпләрнең күпчелегендә озак вакыт дәвамында ремонт эшләре үткәрелмәгән, заманча белем бирү инфраструктурасы (иске биналар, иске уку һәм лаборатория җиһазлары) һәм санитар-көнкүреш шартлары юк дип борчылуын белдерде. Бу факторлар мондый белем бирү оешмаларында һәм яңа яки модернизацияләнгән инфраструктуралы мәктәпләрдәге белем бирү сыйфаты арасында сизелерлек аермага китерергә мөмкин. Татарстан Иҗтимагый палатасы вәкиленең заманча белем бирү инфраструктурасы булмаган авыл мәктәпләренең матди базасын реконструкцияләүгә, капиталь ремонтлауга, модернизацияләүгә юнәлдерелгән максатчан дәүләт программасын тормышка ашыра башлау тәкъдиме түгәрәк өстәлдә катнашучыларның күбесенә ярдәм ителде.

Мәскәү, Пермь, Ростов, Тамбов һәм Төмән өлкәләреннән абруйлы галимнәр, җәмәгать эшлеклеләре, сәнәгатьчеләр, мәгариф өлкәсендә экспертлар чыгышларында шулай ук демография, провинциаль мәдәният эволюциясе һәм аларның авыл мәктәпләренең язмышларында һәм киләчәгендә чагылышы анализланды.

ЯҢАЛЫКЛАРГА ЯЗЫЛУ
Все материалы сайта доступны по лицензии:
Creative Commons Attribution 4.0 International