Казаннан Чистайга кадәр: хәтер һәм батырлыкны берләштерүче проектлар
20 августта Казанда «ТИСБИ» Идарә университеты мәйданчыгында «Татарстан көче: хезмәт һәм батырлык» республика конкурсы кысаларында проектларны яклау булды. Анда Казан, Биектау һәм Балык Бистәсе районнары вәкилләре катнашты. Казаннан – сигез, башка районнардан – дүрт проект тәкъдим ителде.
Конкурска республиканың төрле районнарыннан барлыгы 90нан артык гариза килгән. Алда – Яшел Үзән, Алабуга һәм Чистайда зона этаплары. Конкурсның финалы һәм җиңүчеләрне бүләкләү 2026 елның октябрендә булачак.
Жюри составына ТР Иҗтимагый палатасы вәкилләре, «ТИСБИ» Идарә университеты ректоры Дмитрий Поляков, палатаның мактаулы әгъзалары һәм экспертлары, шулай ук чакырылган белгечләр керде. Жюри рәисе булып ТР Иҗтимагый палатасының мәгариф, фән һәм мәгърифәтчелек эшчәнлеге мәсьәләләре комиссиясе рәисе Тамара Федорова чыгыш ясады. Ул билгеләп үтте:
«Конкурс бик тәэсирле һәм эчтәлекле булды. Без районнарда геройлар турында хәтерне саклау һәм хәрбиләребезгә ярдәм итү өчен никадәр күп эш башкарылганын күрдек. Минем өчен бу мөһим сигнал булды: иҗтимагый советлар белән эшлисе эшләр күп. Ышанам ки, тиешле алымнар белән конкурс Иҗтимагый палатаның чын бренды булачак».
Конкурс Татарстан Республикасы Иҗтимагый палатасы тарафыннан биш номинация буенча үткәрелә: республика үсешендә сизелерлек роль уйнаган предприятиеләрнең тарихын саклау; хезмәт династияләре тарихларын ачыклау һәм популярлаштыру; Бөек Ватан сугышы геройлары, хәрби-интернационалистлар һәм башка сугыш хәрәкәтләрендә катнашучылар турындагы хәтерне саклау; МХОда катнашучы геройлар турындагы истәлекне саклау, аларны социаль адаптацияләү һәм аларга ярдәм итү; МХОда катнашучыларга гуманитар ярдәм оештыру, гаиләләргә, фронт яны территорияләренә һәм хәрби частьләр белән багланышларга.
