Социаль юнәлешле коммерцияле булмаган оешмаларның хисапларында цифрлы трансформация һәм Татарстан Республикасы Рәисе грантлары
Татарстан Республикасы Икътисад министрлыгында социаль юнәлешле коммерцияле булмаган оешмаларга (СЮ КБО) ярдәм итүнең нәтиҗәлелеген арттыруга багышланган киңәшмә булды. Чарада ТР Иҗтимагый палатасы рәисе Александр Терентьев, ТР Икътисад министрының беренче урынбасары Олег Пелевин, ТР Рәисенең эчке сәясәт мәсьәләләре департаменты, РФ Юстиция министрлыгының ТР буенча идарәсе вәкилләре, башкарма комитетлар җитәкчеләренең социаль мәсьәләләр буенча урынбасарлары, шулай ук коммерцияле булмаган оешмаларга ярдәм итү буенча муниципальара ресурс үзәкләре җитәкчеләре катнашты.
Киңәшмәдә СЮ КБО эшенә кагылышлы ике төп мәсьәлә каралды: Россия Юстиция министрлыгына мәҗбүри электрон хисаплылыкка күчү һәм Татарстан Республикасы Рәисе грант конкурсын үткәрү.
2026 елның 1 гыйнварыннан барлык СЮ КБОлар үз эшчәнлекләре турында хисапны РФ Юстиция министрлыгына бары тик электрон рәвештә генә бирергә тиеш. Яңалык документлар тапшыру процедурасын гадиләштерүгә һәм тизләтүгә, шулай ук коммерцияле булмаган сектор эшенең үтәкүренмәлелеген арттыруга юнәлдерелгән.
Күчүне җиңеләйтү өчен Россия Юстиция министрлыгы тарафыннан барлык этапларны сурәтләгән җентекле методик киңәшләр эшләнгән – шәхси кабинетта авторизациядән алып хисап тутыру кагыйдәләренә кадәр. Материаллар, шул исәптән адымлап эшлисе видеоинструкцияләр рәсми порталда урнаштырылган: nco.minjust.gov.ru/ru/faq.
Муниципаль районнарның социаль мәсьәләләр буенча җитәкчеләренә һәм муниципальара ресурс үзәкләренә хисаплар төзүдә СЮ КБОга һәрьяклап методик ярдәм күрсәтү йөкләнде.
Көн тәртибендәге икенче мәсьәлә СЮ КБО өчен грант конкурсына кагылды. 2026 елда гражданлык җәмгыятен үстерүгә ТР Рәисе грантларын бирүгә конкурска гаризалар кабул итү грантыраисарт.рф платформасында гамәлгә ашырыла. Агымдагы елда грант ярдәменең гомуми күләме 163,2 млн сум тәшкил итә. Гаризалар кабул итү ачык һәм 2026 елның 14 августына кадәр дәвам итәчәк.
Киңәшмәдә катнашучылар коммерцияле булмаган оешмаларга конкурс турында мәгълүмат бирү һәм аларга гаризалар әзерләүдә методик ярдәм күрсәтү мәсьәләләре буенча фикер алыштылар. Республикада СЮ КБОга ярдәм итү эше дәвам итәчәк.
