Бертавыштан: ТР Дәүләт Советы Комитеты бюджетка төзәтмәләрне һәм инвесторлар өчен салым ташламаларын хуплады

2026 елның 28 июле, сишәмбе

22 июльдә Татарстан Республикасы Дәүләт Советында Бюджет, салымнар һәм финанс комитеты утырышы булды. Чарада Татарстан Республикасы Иҗтимагый палатасы әгъзасы Фәрит Сафин катнашты.

Утырышта республиканың бюджет һәм салым сәясәтенә кагылышлы өч закон проекты каралды. Төп үзгәрешләр агымдагы елга һәм план чорына бюджет формалаштыру тәртибенә, махсус инвестиция контрактларында катнашучылар өчен салым салу шартларына, шулай ук Татарстан Республикасы бюджет кодексының аерым нигезләмәләренә кагылачак.

Тәкъдим ителгән төзәтмәләр бюджет планлаштыруның нәтиҗәлелеген күтәрергә һәм төбәктә инвестиция активлыгы өчен өстәмә стимуллар булдырырга мөмкинлек бирер дип көтелә. Барлык өч документ та комитет әгъзалары тарафыннан бертавыштан хупланды.