Чиксез талант: Яр Чаллыда сәламәтлеге ягыннан мөмкинлекләре чикләнгән балалар өчен проектка нәтиҗәләр ясалды
24 июньдә Яр Чаллыда «Игелек планетасы» инвалид балаларга һәм аларның гаиләләренә ярдәм итү үзәге автоном коммерцияле булмаган оешмасы тарафыннан гамәлгә ашырыла торган «Игелекле Галактика» хәйрия проектының алтынчы хисап концерты булды.
Быел концертның тематикасы «Авылда каникуллар» булды – бөтен программа авыл бәйрәменең җылы, рухи атмосферасында үтәлде һәм вокаль, хореографик һәм театр номерларын берләштергән бердәм спектакль буларак төзелде. Спектакльнең үзенчәлеге – ата-аналарның катнашуы: алар сәхнәгә актерлар сыйфатында чыгып, ата-аналардан торган вокаль номер башкардылар.
Кунаклар өчен бай интерактив программа оештырылды: фотозона, җанлы музыка – саз дигән милли музыка уен коралында уйнау, җанлы вокал. Теләк белдерүчеләр үзләренә киләчәккә хат яза, яшь артистларга җылы теләкләр калдыра, шулай ук уңайлы чәй зонасында чын самавырдан сыйлар татып карый алды.
Сәламләү сүзе белән Яр Чаллы шәһәре Башкарма комитетының эшмәкәрлеккә ярдәм һәм аны үстерү бүлеге башлыгы Гадел Зәйнетдинов, Татарстан Республикасы Иҗтимагый палатасы әгъзасы Фәйрүзә Мостафина, Алабуга музей-тыюлыгы генераль директоры, Алабуга шәһәр Советы депутаты Гөлзада Руденко, «Горизонт» ресурс үзәге социаль юнәлешле коммерцияле булмаган оешмасы» автоном коммерцияле булмаган оешмасы директоры Ирина Комодорова чыгыш ясадылар.
Проект гамәлдә булган елларда анда 100 дән артык бала катнашкан, алар 6800 сәгатьтән артык белем алган. Быел укучылар 8 Гран-при яуладылар, 65 тапкыр 1 нче дәрәҗә лауреат, 32 тапкыр 2 нче дәрәҗә лауреат булдылар. Әһәмиятле казанышлар арасында – «Добрая Волна» Россиякүләм фестивале финалында икенче урын алу.
Җиңүләр географиясе Алабуга, Яр Чаллы, Казан, Сочи, Орел шәһәрләрен колачлый. Балалар «Казан солистлары» оркестры белән чыгыш ясадылар, «Абилимпикс» фестивальләрендә һәм халыкара конкурсларда катнаштылар, ике профессиональ клип төшерделәр.
Проектның төп идеясе – сәламәтлеге ягыннан мөмкинлекләре чикләнгән балаларны иҗат аша социальләштерүдән тыш, киләчәктә аларны профессиональ яктан тормышка ашыру өчен перспективалар булдыру. Оештыручыларның ышанычы нык: сәламәтлеге нинди булуга карамастан, һәр балада талант бар, ә «Игелекле Галактика» янәшәңдә дөрес команда булганда хыялларның чынга ашуын исбатлады.
