ТР Иҗтимагый палатасы әгъзалары һәм экспертлары Казан шәһәре Идел буе районы балалар йортында тәрбияләнүчеләрне яңа уку елы белән котладылар
Очрашу Казан шәһәренең Идел буе районы балалар йортында булды. Татарстан Республикасы Иҗтимагый палатасы әгъзалары һәм экспертлары балаларны яңа уку елы башлану белән шәхсән котларга һәм файдалы бүләкләр – канцелярия товарлары һәм китаплар сатып алу өчен сертификатлар тапшырырга килделәр.
Ләкин сюрпризларны кунаклар гына әзерләмәде. Җавап итеп балалар йортында тәрбияләнүчеләр алар өчен җыйнак кына, ләкин бик хисле концерт оештырдылар. Аларның ихлас чыгышлары талант һәм игелеклелекнең чын чагылышына әверелде, тамашачыларның күңелләрен нечкәртте.
Концерттан соң җылы аралашу булды. ТР Иҗтимагый палатасы әгъзалары һәм экспертлары балалар белән аралаштылар, аларның уңышлары, планнары һәм хыяллары турында белделәр, яңа биеклекләрне яулауда ышаныч һәм көч теләделәр.
Барлык укучыларга чын күңелдән җиңел уку, нык дуслык, якты ачышлар һәм дөньяны танып-белүләрен телибез! Бу уку елы алар өчен чын-чынлап бәхетле һәм уңышлы булсын!