Рөстәм Миңнеханов: Нәкъ менә Габдулла Тукай әсәрләрендә туган телнең рухи матурлыгы һәм мәдәни байлык буларак роле ачык билгеләнгән

2024 елның 26 апреле, җомга

Татарстан Республикасы Рәисе Рөстәм Миңнехановның Туган тел көнен  һәм Габдулла Тукайның тууына 138 ел тулуны бәйрәм итү уңаеннан мөрәҗәгате. 

«Хөрмәтле татарстанлылар! Кадерле милләттәшләр! Сезне Туган тел көне һәм татар халкының бөек шагыйреГабдулла Тукайның тууына 138 ел тулу уңаеннан тәбрик итәм.

Тукай әсәрләрендә туган телнең халыктагы күңел җылысын, рухи матурлыкны һәм мәдәни байлыкны саклаудагы, буыннар арасында бәйләнешләрне ныгытудагы роле аермачык күрсәтелә.

Халкыбызның традицион рухи-әхлакый хәзинәләре – иң катлаулы шартларда да безгә яшәү көче өсти торган бәрәкәтле чыганак. Алар үсеш һәм казанышларыбыз нигезен тәшкил итә. Шагыйрь чиксез кыйммәткә ия шул байлыкнысокландыргыч осталык белән сурәтләүгә иреште.

Даһи әдипнең тезмә һәм чәчмә әсәрләре туган җирне ихлас ярату хисләре белән сугарылган, аларда хезмәт сөю, батырлык, ихласлык, намус югары күтәрелә, кешедәге түбән сыйфатлар, ялкаулык, үзеңне генә кайгырту кире кагыла. Каләменең җырлы-көйле булуы, фикер тирәнлеге Тукайны дөнья әдәбиятының бөек иҗатчылары белән бер сафка куя.

Габдулла Тукайның китап-җыентыклары замандашларын таң калдыра, Бөек Ватан сугышы елларында сугышчыларга дәрман бирә. Шагыйрьнең әсәрләре бүген дә Ватанны сакларга рухландыра. 

Тукай иҗаты хәзерге көндә дә татар мәдәниятенеңүзенчәлекле матурлыгының һәм башка халыклар мәдәниятләре белән үрелеп үсүенең  гәүдәләнеше булып кала.

Быел тууының 225 еллыгы билгеләп үтеләчәк мәшһүр Пушкинга Тукай ихтирамлы мөнәсәбәттә булган. Югары максатка омтылышның иҗатчыны да, укучыны да илһамландырганын татар шагыйре үз каләме белән раслый. 

Тукайның камиллек өлгесе булган шигъри юллары безнең күңелләрдә һәрчак аваздашлык тапсын, игелекле эшләргә, яңа уңышларга этәргеч биреп, һәркемгә күңел җылысы бүләк итсен.

Сезгә чын йөрәктән нык сәламәтлек, бәхет һәм иминлек телим».

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International