Татарстан яшьләре «Сугыш. Җиңү. Хәтер» форумына Питрәч районына барды
«Сугыш. Җиңү. Хәтер» беренче яшьләр патриотик форумы 2 һәм 3 сентябрьдә Татарстанның Питрәч районы Ленино-Кокушкино авылында узды. Чара «Форпост», «Җиңү волонтерлары», «Яшь армия» кебек яшьләр оешмаларының 240 вәкилен җыйды.
Сәхнәдә форум башланганчы сугыш еллары музыкасы яңгырады, холлда Бөек Ватан сугышы чорындагы корал күргәзмәсе эшләде. Сәхнәдән алып баручы форум хәрби дан көннәренең берсе — Икенче бөтендөнья сугышы тәмамлану көненә багышланган дип игълан итте. «Безнең халыкның фашизмны Җиңүгә керткән өлешен искә төшерү һәм үсеп килүче буынны геройларыбыз үрнәгендә тәрбияләү, рухи, әхлакый сыйфатлар, каһарманлык һәм үз Ватаныбыз чикләрен яклауга әзерлекне формалаштыру бик мөһим», — дип белдерде ул.
Моннан тыш, форум терроризмга каршы көрәштә бердәмлек көненә багышланды. Оештыручылар бу датаны Украинадагы махсус хәрби операция белән бәйләде, әлеге ил хакимиятен «халыкара террорчылык үрчетү урыны» булуда гаепләде.
Җыелган кешеләргә хәзерге вакытта гуманитар миссия белән Украинада, Харьков өлкәсендә булган Көек авылы гыйбадәтханәсе рухание иерей Виталий Беляевтан сәламләү сүзе күрсәтелде. Элегрәк ул Чечня һәм Сириядә сугышларда катнашкан.
Форумда район башкарма комитеты җитәкчесе Альберт Хәбибуллин, «Патриот» спорт һәм армиягә кадәр әзерлек республика үзәге директоры һәм Татарстан яшьләре белән патриотик эш Координаторы Дмитрий Литвинов, «Җиңү Волонтерлары» хәрәкәте рәисе, «Форпост» республика үзәге директоры Тимур Камалетдинов, Питрәч районындагы «Форпост» үзәге директоры Наилә Таҗиева чыгыш ясады.
«Без яшьләргә тарихи даталар, Бөек Ватан сугышы тәмамлану көне турында искә төшерергә, террорчылыкка каршы көрәштә бердәмлек көне турында сөйләшергә, Украинада барган вакыйгалар белән аналогия үткәрергә телибез», - дип аңлатты оештыручыларның мотивациясен Наилә Таҗиева.
«Форпост» үзәген үстерүгә керткән шәхси өлешләре, патриотик тәрбия бирү буенча педагогик эшчәнлеге өчен һәм хокук саклау хәрәкәтенең егерме еллыгы уңаеннан Айрат Низамовка, Ольга Заһировага, Евгений Агачевка, Лариса Кирилловага, Светлана Егоровага, Артур Газизовка һәм башкаларга рәхмәт хатлары тапшырылды.
Шуннан форумда катнашучыларны лекцияләр, квизлар, хәрби-спорт дисциплиналарын искә төшерү, Калашников автоматын сүтеп җыю буенча мастер-класс, зыян күрүчеләргә беренче ярдәм күрсәтү буенча викторина, төеннәр бәйләү буенча мастер-класс, шулай ук Бөек Ватан сугышы тарихын белү буенча викторина көтте. Концерт номерлары белән Халыкара конкурслар лауреатлары - Роберт Миңнуллин һәм Эльзира Яруллина, «Леха Казак» коллективы чыгыш ясады.
Чара Мәдәни инициативалар президент фонды, Президент грантлары фонды, яшьләр эшләре буенча Федераль агентлык, Питрәч районы башкарма комитеты һәм берничә иҗтимагый оешма ярдәме белән узды.