Иҗтимагый палата рәисе Асия Тимирясова «Мәктәпкә җыенырга ярдәм ит» акциясендә катнашты
«Мәктәпкә җыенырга ярдәм ит» хәйрия акциясе, ул аз керемле, күп балалы гаиләләрдән, ятим балаларга һәм ата-ана тәрбиясеннән мәхрүм калган балаларга, инвалид балаларга һәм ярдәмгә мохтаҗ барлык мәктәп укучыларына ярдәм итүгә юнәлтелгән. Ул Татарстанда 2007 елдан бирле ел саен үткәрелә.
«Мәктәпкә җыенырга ярдәм ит!» хәйрия акциясен оештыручылар Казанның Вахитов һәм Идел буе районнарыннан 300дән артык беренче сыйныф укучылары өчен истә калырлык бәйрәм оештырдылар. Башкаланың «Чулпан» мәдәни үзәгендә күңелле тамаша уку өчен кирәк-яраклар туплап портфельләр тапшыру белән тәмамланды.
Татарстан Республикасы Иҗтимагый палатасы комиссиясе рәисе, Татарстан Республикасы Мәгариф һәм фән министрлыгы каршындагы Иҗтимагый совет рәисе Асия Тимирясова бәйрәмдә катнашкан хәйриячеләрнең балаларга ярдәм итәргә теләвен һәм бердәмлеген билгеләп үтте.
«Тормыш авырлыкларына юлыккан балаларга ярдәм итеп, без аларга иң мөһим дәрес – игелек һәм ярдәмчеллек дәресе бирәбез. Шәфкатьлелек акциясенә гражданнар гына түгел, эре компанияләр, кече һәм урта бизнес предприятиеләре, шәхси эшмәкәрләр һәм хакимият органнары, дини оешмалар һәм социаль учреждениеләр дә кушылды. Хәйриячеләрнең яхшы эшләре балалар өчен гомер буена үрнәк булачак", - дип ассызыклады ул.
Ул җитәкләгән В.Г. Тимирясов исемендәге Казан инновацион университеты «Мәктәпкә җыенырга ярдәм ит» хәйрия акциясендә беренче елдан бирле актив катнаша.
Бу көннәрдә ярдәмгә мохтаҗ балаларга ярдәм итү чаралары Татарстанның барлык муниципалитетларында уза. Хәйрия эшчәнлеге мәсьәләләре буенча республика советы, «Бердәм Россия» партиясенең Татарстан төбәк бүлеге, Татарстан Республикасы Иҗтимагый палатасы, Татарстан Республикасы Мәгариф һәм фән министрлыгы, Татарстан Республикасы Муниципаль берәмлекләре башкарма комитетлары оештырган Игелек марафонына йөзләгән меценат кушылды инде. Казанда гына да меңнән артык мәктәп укучысы, шул исәптән 990 беренче сыйныф укучысы ашыгыч ярдәм алачак.
