«Сила быть собой» инклюзив проекты ТР Рәисе гранты ярдәмендә мода күрсәтү белән тәмамланды
6 апрельдә Яр Чаллыда «Игелек планетасы» инвалид балаларга һәм аларның гаиләләренә ярдәм үзәге «Коммерцияле булмаган автоном оешмасы оештырган «Сила быть собой» («Үз-үзең булу көче») хәйрия проектының финалы булды. Чара гражданлык җәмгыятен үстерүгә Татарстан Республикасы Рәисе гранты кысаларында гамәлгә ашырылды.
Проектның төп героинялары сәламәтлеге ягыннан мөмкинлекләре чикләнгән 11 яшүсмер кыз булды. Өч ай дәвамында катнашучылар әзерлек үттеләр: үз-үзләрен презентацияләү, дефиле, фотога төшү серләренә өйрәнделәр, этикет нигезләре белән таныштылар һәм үз образларын булдыру юнәлешендә эшләделәр. Алар белән белгечләр, стилистлар һәм остазлар шөгыльләнде.
Проектның финалы инклюзив мода күрсәтү рәвешендә үткәрелде, анда һәр кыз профессиональ модель белән дуэтта подиумга чыкты. Бу мизгелләр ярдәм, кабул итү һәм тигез мөмкинлекләр символына әверелде.
Чараның кунаклары арасында Яр Чаллы шәһәре Башкарма комитеты җитәкчесе урынбасары Наталия Кропотова да бар иде, ул катнашучыларны «бәллүр принцессалар» дип атады. Һәр кыз бүләкләр алды һәм рәхмәт сүзләре ишетте.
Оештыручылар билгеләп үткәнчә, катнашучылар өчен проект рухи үсешнең мөһим этабына әверелде – икеләнүдән һәм оялудан ышанычлылыкка, ачыклыкка һәм үз-үзеңне кабул итүгә кадәр. «Үз-үзең булу көче» проекты матурлыкның чикләре булмавын, үз-үзеңне кабул итүнең башкаларга күренү мөмкинлегеннән башлануын искәртте.