ТР Иҗтимагый палатасының социаль мәсьәләләр һәм сәламәтлек саклау комиссиясе социаль юнәлешле коммерцияле булмаган оешмаларга остазлык мәктәбенең өченче курс онлайн-тренингларын башлап җибәрде
Социаль юнәлешле коммерцияле булмаган оешмаларга остазлык мәктәбенең өченче курсы кысаларында «Халык алдында чыгышлар: аудиториягә йогынты» онлайн-тренингы үткәрелде. Дәресне Ак Барс банкы Корпоратив университетының баш бизнес-тренеры Диана Вәлиуллина үткәрде. Социаль юнәлешле коммерцияле булмаган оешмаларның җитәкчеләре һәм хезмәткәрләре катнашты.
Тренинг барышында аудитория алдында үзеңне ышанычлы хис итәргә һәм чыгышларны ышандырырлык итәргә ярдәм итә торган инструментларны тикшерделәр. Спикерның образы нинди детальләрдән: тышкы кыяфәт, вакытны исәптә тоту хисе, хәрәкәтләр һәм позицияләрдән, сөйләмнең чисталыгы һәм гадилеге, шулай ук чыгышның дөрес темпыннан гыйбарәт булуы турында сөйләделәр.
Дәрес практик форматта булды. Катнашучылар сулыш алу гимнастикасын башкардылар, сизү органнарын уяту өчен «1-2-3-4-5» күнегүен кулланып карадылар, шулай ук, сүзлек запасын һәм сөйләмнең сыгылмалылыгын үстерү өчен, билгеле бер хәрефкә сүзләр төзеделәр. Үз-үзеңне тәкъдим итү практикасы аерым блок булды.
Диана Вәлиуллина билгеләп үткәнчә, чыгышында үзең турында сөйләү генә түгел, ә аудиториягә сезне ни өчен тыңларга кирәклеген һәм сөйләгән тарихыгызның башка кешеләргә нинди кыйммәт бирә алуын аңлату мөһим.
Курс тыңлаучылары иң киң таралган темаларның берсе — халык алдында чыгышлардан курку турында фикер алыштылар. Бизнес-тренер дулкынлануны җиңү буенча эшләүнең гади алгоритмын тәкъдим итте: «Мин нәрсәдән куркам?», «Иң начары нәрсә булырга мөмкин?», катлаулы хәлләр килеп чыккан очракта кыласы гамәлләр планын уйларга һәм мөмкин булган куркынычларны киметү өчен инде хәзер үк нинди адымнар ясарга мөмкин булуын билгеләргә.
Ахырда тренингта катнашучылар үз эшчәнлекләре турында кыска, аңлаешлы һәм мантыйкый сөйләргә ярдәм итәчәк файдалы үз-үзеңне презентацияләү структурасын күрделәр. Традиция буенча катнашучылар очрашуны уртак онлайн-фото белән тәмамладылар.
Бу агымдагы уку елы кысаларында дүртенче дәрес. Элегрәк социаль юнәлешле коммерцияле булмаган оешмаларга остазлык мәктәбенең өченче курсында катнашучылар маркетинг стратегияләрен һәм ясалма интеллектны куллануны, коммерцияле булмаган оешмаларга финанс идарәсен, шулай ук идарә һәм коммуникациянең иң яхшы практикаларын өйрәнделәр. Тыңлаучыларны киләчәктә тагын бик күп кызыклы темалар һәм гамәли инструментлар көтә.
Проект Татарстан Республикасы Иҗтимагый палатасы тарафыннан Татарстан Республикасы Сәүдә-сәнәгать палатасы, «АК БАРС» БАНК ГАҖ корпоратив университеты, «АК БАРС СОЗИДАНИЕ» Хәйрия фонды һәм «Шәһәр мәгариф үзәге» өстәмә һөнәри белем бирү шәхси учреждениесе белән берлектә гамәлгә ашырыла. Быел күчмә сессияне үткәрүгә «АК БАРС СОЗИДАНИЕ» Хәйрия фонды «Лукойл» ГАҖ социаль һәм мәдәни проектлар конкурсында грант алды, аны Татарстанда «РИТЭК» ҖЧҖ үткәрә.