РФ Президенты В. Путинның Донецк Халык Республикасы, Луганск Халык Республикасы, Запорожье һәм Херсон өлкәләренең Россия белән кушылу көне уңаеннан мөрәҗәгате

Кадерле дуслар! Хөрмәтле Россия гражданнары!

Сезне чын күңелдән бәйрәм белән котлыйм – Донецк һәм Луганск халык Республикаларының, Запорожье һәм Херсон өлкәләренең безнең зур, бердәм илебез белән берләшүе көне белән.

Өч ел элек Донбасс һәм Новороссиядәге референдумнарда миллионлаган ватандашларыбыз үзләренең киләчәген мөстәкыйль һәм ирекле рәвештә билгеләделәр, озак еллар күңелендә йөрткән хыялын тормышка ашырдылар, мөһим, язмышны хәл итә торган карар кабул иттеләр – үз Ватаныбыз, Россия белән булу, алар һәрвакыт шул гаиләнең бер өлеше булган туган гаиләләренә кайту. Без тиеш булганны эшләдек һәм моның белән горурланабыз, – үзебезнең абыйларыбызның һәм апаларыбызның ныклы, җаваплы сайлауларын хупладык.

Бүген, бу сайлауны яклап, безнең сугышчылар һәм командирлар атакага күтәрелә, гадел сугыш алып бара һәм бөтен ил, бөтен Россия тырыша. Бергәләп без Ватанга булган мәхәббәтебезне һәм тарихи язмышыбызның бердәмлеген яклыйбыз, көрәшәбез һәм җиңәбез, төп илкүләм мәнфәгатьләрне, уртак хәтерне һәм кыйммәтләрне, рус телен, гореф-гадәтләрне, мәдәниятне һәм динне яклыйбыз, ата-бабаларыбызның, Россиянең күп буын патриотларының, сугышчыларының һәм хезмәтчәннәренең батырлыкларын хөрмәт итәргә изге хокукыбызны яклыйбыз. Шулай ук бергә, иңгә-иң куеп уртак йортыбызны – бөек һәм бәйсез илне, суверен дәүләтне төзекләндерүне дәвам итәчәкбез, теләсә нинди сынауларны җиңәчәкбез һәм тагын да көчлерәк кенә булачакбыз.

Азат ителгән шәһәрләр һәм бистәләр халкына хәзер никадәр авыр икәнен беләм. Чыннан да кискен, көнүзәк проблемалар күп. Алар арасында су белән тәэмин итүнең тотрыклыгы, сыйфатлы медицинаның һәркем өчен мөһим булган беренчел мәсьәләләр дә бар. Шул ук вакытта хәрби хәрәкәтләр барышында җимерелгәнне торгызу гына түгел, дистә еллар дәвамында беркем дә рәтләп шөгыльләнмәгән инфраструктураны тәртипкә китерергә кирәк.

Шуңа күрә социаль-икътисади үсеш, асылда – безнең борынгы, тарихи рус җирләрен торгызу буенча масштаблы программа эшләнде. Аңа бөтен ил, Россиянең барлык төбәкләре кушылды. Аларның турыдан-туры катнашуы, шулай ук саллы федераль ярдәм нәтиҗәсендә 2022 елдан Донбасста һәм Новороссиядә 23,5 меңнән артык төрле объект төзелгән һәм ремонтланган. Бу торак йортлар һәм мәктәпләр, заманча медицина учреждениеләре, спорт комплекслары һәм алдынгы яшьләр үзәкләре. Энергетика, элемтә, торак-коммуналь хуҗалык, транспорт системасы яңартыла. 460 чакрым инженер челтәре, 6350 чакрым автомобиль юлы салынган һәм модернизацияләнгән инде.

Әйе, әле зур эш көтә. Әмма куелган барлык бурычларны без, һичшиксез, хәл итәчәкбез. Донбасс һәм Новороссиянең сәнәгать, аграр, фәнни, мәдәни потенциалын ачу өчен тиешле шартлар тудырыйк, – монда яңа гаиләләр төзелсен, кешеләр үз балаларын һәм оныкларын үстерсен һәм тәрбияләсен, белем алу, иҗат, үз-үзеңне тормышка ашыру, һөнәри үсеш өчен күбрәк мөмкинлекләр тусын.

Бу бәйрәм көнендә, Ватанны саклаучылар елында солдатларга һәм офицерларга, заманыбызның чын геройларына аерым бер хис белән мөрәҗәгать итәм: сезгә Ватанга тугрылыгыгыз, сугышчан батырлыгыгыз өчен, авыр хәрби хезмәтегезнең һәр көне өчен рәхмәт белдерәм. Ышанам ки, сезнең ярдәм белән Россиянең иминлеге ышанычлы тәэмин ителәчәк, ә Донбасс һәм Новороссиянең героик җиренә озак көтелгән һәм ныклы тынычлык кире кайтачак.

Без бергә. Димәк, безнең барлык планнар тормышка ашырылачак.

Бәйрәм белән, янәдән берләшү көне белән!