8 сентябрьдә Татарстан Республикасы Дәүләт Советы депутатларын сайлаулар узачак
Җиденче чакырылыш Татарстан Республикасы Дәүләт Советы депутатларын сайлауларда һәм Татарстан Республикасы муниципаль берәмлекләренең вәкиллекле органнары депутатларын өстәмә сайлауларда тавыш бирү 8 сентябрьдә 7:00 сәгатьтән 20:00 сәгатькә кадәр узачак.
Сайлаучыларга Татарстан Республикасы Дәүләт Советына 100 депутат сайларга туры киләчәк: 50се – бердәм сайлау округы буенча, 50се – бермандатлы сайлау округлары буенча. Моннан тыш, бу көнне өстәмә сайлаулар 38 муниципаль берәмлектә узачак, анда 145 җирле депутат сайланачак.
1 нче июльгә булган мәгълүматларга караганда, 2 926 245 татарстанлы актив сайлау хокукына ия.
Татарстан Республикасы Дәүләт Советы депутатларын сайлауларда сайлаучылар үзләренең факттагы урыннары буенча тавыш бирә алачак, «Мобиль сайлаучы» механизмы кулланылачак, әмма шул ук вакытта гаризаны 24 июльдән 4 сентябрьгә кадәр ТИК, МФЦ һәм Бердәм дәүләт һәм муниципаль хезмәтләр порталына тапшыру срокларын үтәргә кирәк. 28 августтан 4 сентябрьгә кадәр теләсә кайсы участок комиссиясенә гариза бирергә мөмкин. Шуңа да игътибар итәргә кирәк, әгәр сайлаучы үз округында тавыш бирергә теләми икән, аның партия исемлекләре буенча гына тавыш бирү мөмкинлеге булачак, ягъни алар кулларына бер генә бюллетень алачак.
Муниципаль сайлауларда «Мобиль сайлаучы» механизмы каралмаган, әмма вакытыннан алда тавыш бирү мөмкинлеге кала. Территориаль сайлау комиссияләрендә вакытыннан алда тавыш бирү 28 августтан 3 сентябрьгә кадәр, участок сайлау комиссияләрендә 4 сентябрьдән 7 сентябрьгә кадәр башланачак.
Бүгенге көндә Татарстан Республикасында сайлау процессы барышында законнарның үтәлешен һәрьяклап һәм сыйфатлы контрольдә тотуны тәэмин итү буенча кирәкле инфраструктура булдырылды.
Сайлаулар барышында Татарстан Республикасының барлык участок сайлау комиссияләрендә булган Иҗтимагый палата күзәтүчеләре бу өлкәдә мөһим эш башкара.
Җәмәгать күзәтүчеләрен әзерләү буенча махсус программа эшләнде, аның кысаларында алар сайлауларда җәмәгать контролен гамәлгә ашыру өчен кирәкле белем һәм күнекмәләр алалар. Укыту барышында күзәтүчеләр Россия Федерациясе Иҗтимагый палатасы күзәтүчеләр өчен әзерләгән «Алтын стандарт» белән танышалар.